BJP Assembly Election Plan 2023 : 'బీసీ' నినాదంతో ఎన్నికల బరిలోకి కమలదళం.. 35 నుంచి 40 సీట్లు వారికే!

BJP Assembly Election Plan 2023 : బీసీ నినాదంతో ఎన్నికల బరిలోకి దిగేందుకు కమల దళం ప్రణాళికలు రచిస్తోంది. బీఆర్​ఎస్​, కాంగ్రెస్‌ పార్టీలు బీసీలకు అన్యాయం చేస్తున్నాయని ఆ పార్టీ నాయకులు ఆరోపిస్తున్నారు. బీసీల ఓట్లే లక్ష్యంగా పావులు కదుపుతున్న బీజేపీ నాయకత్వం.. 88 నియోజకవర్గాల్లో 35 నుంచి 40 టికెట్లు బీసీలకు కేటాయించే యోచనలో ఉంది.

BJP Assembly Election Plan 2023 :అసెంబ్లీ ఎన్నికల్లో సత్తా చాటడమే లక్ష్యంగాభారతీయ జనతా పార్టీ(Telangana BJP) వ్యూహాత్మకంగా అడుగులు వేస్తోంది. ఇప్పటికే అభ్యర్థుల కసరత్తులో నిమగ్నమైన ఆ పార్టీ నాయకత్వం.. తాజాగా మరో కీలక నిర్ణయాన్ని తీసుకునేందుకు సిద్ధమైంది. బీసీ నినాదంతో ఎన్నికల బరిలోకి దిగేందుకు కమలదళం ప్రణాళికలు రచిస్తోంది.

Telangana Assembly Elections 2023 : ఎన్నికల్లో అభ్యర్థుల ఎంపికలో బీఆర్​ఎస్​, కాంగ్రెస్‌ పార్టీలు బీసీలకు అన్యాయం చేస్తున్నాయని ఆరోపిస్తున్న ఆ పార్టీ నాయకులు.. ఎన్నికల ప్రచారంలో ఇదే నినాదంతో ముందుకు వెళ్లేందుకు సిద్ధమయ్యారు. బీసీల ఓట్లే లక్ష్యంగా పావులు కదుపుతున్న బీజేపీ నాయకత్వం.. 88 నియోజకవర్గాల్లో 35 నుంచి 40 టికెట్లు బీసీలకు కేటాయించే యోచనలో ఉంది. అత్యధిక జనాభా ఉన్న ముదిరాజ్‌లకు 5 టికెట్లు ఇచ్చే అవకాశం ఉన్నట్లు తెలుస్తోంది.

మరోవైపు రాష్ట్రంలో కీలక బీసీ నేతలు కాషాయ తీర్థం పుచ్చుకుంటున్నారు. నిన్న నాంపల్లిలోని బీజేపీ కార్యాలయంలో వీరశైవ లింగాయత్‌ రాష్ట్ర అధ్యక్షుడు వన్నె ఈశ్వరప్ప.. బీజేపీ రాష్ట్ర అధ్యక్షుడు కిషన్​రెడ్డి, ఎంపీ లక్ష్మణ్​ ఆధ్వర్యంలో బీజేపీలోకి చేరారు. ఈ సందర్భంగా రాజ్యసభ సభ్యుడు లక్ష్మణ్​ మాట్లాడుతూ.. బీజేపీ రాజకీయంగా బీసీలకు పెద్ద పీట వేస్తోందని పేర్కొన్నారు. బీసీల అభ్యున్నతి కోసం ప్రధాని మోదీ కృషి చేస్తున్నారని తెలిపారు.

BJP BC Plan :రాబోయే ఎన్నికల్లో రాహుల్‌ గాంధీ, రేవంత్​రెడ్డిలకు బీసీల ఓట్లు అడిగే నైతిక హక్కు లేదన్నారు. రాష్ట్రంలో 54 శాతం ఉన్న బీసీలకు కేవలం మూడు మంత్రి పదవులే ఇచ్చిన కేసీఆర్‌, కేటీఆర్‌.. బీసీ ద్రోహులేనని దుయ్యబట్టారు. గత ఆదివారం పరేడ్​ గ్రౌండ్​లో నిర్వహించిన ముదిరాజ్​ సభకు బీజేపీ నేత ఈటల రాజేందర్​ హాజరయ్యారు.

రాష్ట్రంలో అధికశాతం ఉన్న బీసీ ప్రజలకు ఎన్నికల్లో అన్యాయం జరుగుతోందని ఈటల దుయ్యబట్టారు. ఓట్లు మావే సీట్లు మావే అనే విధంగా కొట్లాడాలి తప్ప.. నేతలకు జేజేలు కొడితే బతుకులుమారవని ఈటల రాజేందర్‌ పిలుపునిచ్చారు. సుప్రీంకోర్టులో పెండింగ్​లో ఉన్న అంశంపై ప్రభుత్వం ఎందుకు దృష్టి సారించట్లేదని నిలదీశారు. ముదిరాజ్‌లకు బీఆర్​ఎస్​ ఒక్క సీటు కూడా ఇవ్వలేదని మండిపడ్డారు.

జనాభా దమాసా ప్రకారంగా 11 ఎమ్మెల్యే సీట్లు ఈటల ఇవ్వాలన్నారు. బీసీలకు 9 మంత్రి పదవులు ఇవ్వాల్సి ఉండగా కేవలం ముగ్గురికి మాత్రమే ఇవ్వడంపై అయన సీఎం కేసీఆర్ ధ్వజమెత్తారు. ఓట్లు మావే సీట్లు మావే అనే నినాదాం ఇవ్వాలని ముదిరాజులకు పిలుపునిచ్చారు. పదేళ్లుగా ఆదివాసులకు మంత్రి పదవి ఇవ్వలేదని మండిపడ్డారు.