'నన్ను పెళ్లి చేసుకో.. వయసు 65 ఏళ్లే...'

కాటికి కాళ్లు చాపిన వృద్ధుడు ఇరవై నాలుగేళ్ల పడుచు పిల్లపై కన్నేశాడు. పెళ్లి చేసుకోవాలంటూ రోజూ వేధించాడు. బాధితురాలు విషయాన్ని కుటుంబ సభ్యులకు చెప్పగా... ఇరు కుటుంబాల మధ్య గొడవ జరిగింది.

హైదరాబాద్ చాదర్‌ఘాట్ పోలీసు స్టేషన్ పరిధిలో రెండు కుటుంబాల మధ్య జరిగిన ఘర్షణలో ఓ వ్యక్తి తీవ్రంగా గాయపడి అపస్మారకస్థితిలో వెళ్లాడు. గత కొన్నాళ్లుగా అబ్దుల్ అజీజ్‌ అనే 65 ఏళ్ల వృద్ధుడు పక్కింట్లో ఉంటున్న 24 ఏళ్ల యువతిని పెళ్లి చేసుకోవాలంటూ వేధింపులకు పాల్పడుతున్నాడు.

ఈ విషయాన్ని బాధితురాలు కుటుంబ సభ్యులకు తెలుపగా... అజీజ్​ను నిలదీసేందుకు వారి ఇంటికి వెళ్లారు. ఈ క్రమంలో ఇరు కుటుంబాల మధ్య వాగ్వాదం జరిగింది. అబ్దుల్ అజీజ్ కుటుంబ సభ్యులు యువతి కుటుంబ సభ్యులపై కర్రలతో దాడికి దిగారు. ఈ ఘటనలో ఓ యువకుడి తలకు బలమైన గాయమై అపస్మారక స్థితిలోకి వెళ్లాడు.

బాధితురాలి కుటుంబ సభ్యులు వెంటనే యువకుడిని ఉస్మానియా ఆసుపత్రికి తరలించారు. ఈ ఘటనపై బాధితులు పోలీసులకు ఫిర్యాదు చేయగా కేసు నమోదు చేసి దర్యాప్తు చేస్తున్నారు.

ఇవీ చూడండి: పదకొండు రోజుల్లో ఎలా సాధ్యమైంది?