తెలంగాణ రిజిస్ట్రేషన్ల శాఖకు క్రమంగా ఆదాయం పెరుగుతోంది. సబ్‌ రిజిస్ట్రార్‌ కార్యాలయాలు పూర్తి స్థాయిలో పని చేయడం మొదలు పెట్టిన 6 రోజుల్లోనే రూ. 200 కోట్ల మేర ఆదాయం ప్రభుత్వ ఖజానాకు చేరింది. లాక్‌ డౌన్‌ సమయంలో ప్రధాన కార్యాలయం పని చేస్తున్నప్పటకీ దాదాపుగా అన్ని సబ్‌ రిజిస్ట్రార్‌ కార్యాలయాలు పనిచేయలేదు. మార్చి 22 నుంచి మే 7 వరకు కేవలం 6,544 డాక్యుమెంట్లు రిజిస్ట్రేషన్‌ కాగా ప్రభుత్వానికి రూ.27 కోట్లు మాత్రమే రాబడి వచ్చింది.
ప్రభుత్వం సడలింపులు ఇవ్వడం వల్ల 50 రోజుల తర్వాత ఈ నెల 11 నుంచి రాష్ట్రంలోని 141 సబ్‌ రిజిస్ట్రార్‌ కార్యాలయాలు పూర్తి స్థాయిలో పనిచేస్తున్నాయి. దీంతో లాక్‌డౌన్‌ ముందు అర్ధాంతరంగా నిలచిపోయిన రిజిస్ట్రేషన్లతోపాటు కొత్తగా కూడా రిజిస్ట్రేషన్ల ప్రక్రియ మొదలైంది. ఈ నెల 11 నుంచి 16 వరకు దాదాపు 33 వేల డాక్యుమెంట్లు రిజిస్ట్రేషన్‌ కావడం వల్ల రూ.91.54 కోట్లు, ఈ స్టాంపుల రెవెన్యూ ద్వారా మరో 108.79 కోట్ల ఆదాయం ప్రభుత్వానికి వచ్చింది. ఈ రెండింటి ద్వారా ప్రభుత్వానికి వచ్చిన ఆదాయం.. రెండు వందల కోట్లు అని రిజిస్ట్రేషన్‌ శాఖ అధికారిక లెక్కలు చెబుతున్నాయి.