నేడే అసెంబ్లీ చివరి రోజు

బడ్జెట్ సమావేశాలు నేటితో ముగియనున్నాయి. ఈరోజు ద్రవ్యవినిమయ బిల్లుపై ఉభయ సభల్లో చర్చించి ఆమోదిస్తారు. శాసనసభ ఉపసభాపతిగా  పద్మారావుగౌడ్ ఏకగ్రీవంగా ఎన్నిక కానున్నారు.

బడ్జెట్ సమావేశాలు ఇవాళ్టితో ముగియనున్నాయి. 2019-20 ఆర్థిక సంవత్సరానికి ఓటాన్ అకౌంట్ బడ్జెట్ కోసం శుక్రవారం నుంచి సమావేశాలు నడుస్తున్నాయి. మొదటి రోజే ఉభయ సభల్లో బడ్జెట్ ప్రవేశపెట్టారు. శనివారం బడ్జెట్​పై చర్చ పూర్తయింది. ఇవాళ ద్రవ్య వినిమయ బిల్లుపై ఉభయ సభల్లోనూ చర్చించి ఆమోదిస్తారు.

ఉప సభాపతి ఎన్నిక..

మాజీ ఎమ్మెల్యే బద్దం బాల్ రెడ్డి మృతికి శాసనసభ సంతాపం ప్రకటిస్తుంది. అనంతరం ఉపసభాపతి ఎన్నిక చేపడతారు. డిప్యూటీ స్పీకర్ ఎన్నిక కోసం కేవలం పద్మారావుగౌడ్ నామినేషన్ మాత్రమే దాఖలైంది. దీంతో ఆయన ఏకగ్రీవంగా ఎన్నికైనట్లు ప్రకటిస్తారు. ఆ తరువాత ద్రవ్య వినిమయ బిల్లుపై శాసనసభలో చర్చిస్తారు. ఏప్రిల్ నుంచి సెప్టెంబర్ వరకు ఆర్నెళ్ల కాలానికి 91 వేల కోట్ల రూపాయలను ప్రభుత్వానికి అనుమతించే బిల్లుపై చర్చిస్తారు. ముఖ్యమంత్రి సమాధానం అనంతరం బిల్లును ఆమోదిస్తారు.

పెద్దల సభలో...

శాసనమండలిలో సభ ప్రారంభం కాగానే శనివారం అసెంబ్లీ ఆమోదించిన పంచాయతీరాజ్, జీఎస్టీ చట్ట సవరణల బిల్లులపై చర్చిస్తారు. శాసనసభలో ద్రవ్య వినిమయ బిల్లు ఆమోదం పొందిన అనంతరం అనుబంధ అజెండా కింద మండలిలోనూ ద్రవ్యవినిమయ బిల్లుపై చర్చిస్తారు. ప్రభుత్వ సమాధానం అనంతరం బిల్లును ఆమోదిస్తారు. దీంతో బడ్జెట్ సమావేశాల అజెండా పూర్తవుతుంది.

ఇవీ చదవండి:రహదారులపై డేగ కన్ను