కరోనా దెబ్బకు ఫ్రెంచ్​ ఓపెన్​ 4 నెలలు వాయిదా

కరోనా వైరస్​ సెగ ప్రపంచ వ్యాప్తంగా పలు క్రీడాటోర్నీలపై పడింది. ఇప్పటికే క్రికెట్​, ఫుట్​బాల్​ క్రీడలకు సంబంధించిన కొన్ని టోర్నీలు రద్దవగా.. మరికొన్ని వాయిదా పడ్డాయి. తాజాగా టెన్నిస్​లో ప్రముఖ టోర్నీ అయిన ఫ్రెంచ్​ ఓపెన్​కు అదే పరిస్థితి ఎదురైంది. కొవిడ్​-19 వ్యాప్తి నేపథ్యంలో ఈ పోటీలను దాదాపు 4 నెలలు వాయిదా వేశారు నిర్వాహకులు.

కరోనా వైరస్‌ (కొవిడ్‌-19) ధాటికి క్రీడా ప్రపంచం విలవిలలాడుతోంది. ఇప్పటికే పలు క్రీడా మ్యాచ్‌లు, టోర్నీలు వాయిదా లేదా రద్దవుతుండగా.. తాజాగా ఈ జాబితాలో ప్రతిష్ఠాత్మక ఫ్రెంచ్ ఓపెన్ కూడా చేరింది. మే 24 నుంచి జూన్ 7 వరకు జరగాల్సిన ఈ టోర్నీని.. సెప్టెంబర్‌ 20 నుంచి అక్టోబర్ 4 వరకు నిర్వహించేలా షెడ్యూల్‌ను మార్చారు.

మహమ్మారి కరోనా ప్రపంచాన్ని వణికిస్తోన్న నేపథ్యంలో ఎర్రమట్టిలో ఆడే ఈ టెన్నిస్‌ టోర్నీని షెడ్యూల్‌ ప్రకారం నిర్వహించలేమని ఫ్రెంచ్‌ ఓపెన్ నిర్వాహకులు తెలిపారు. ఈ టోర్నీని వాయిదా వేయడం వల్ల ఫ్రెంచ్‌ ఓపెన్‌, యుఎస్‌ ఓపెన్‌కు మధ్య అంతరం వారం రోజులుగా మారింది. షెడ్యూల్‌ ప్రకారం యుఎస్‌ ఓపెన్‌ ఆగస్టు 24 నుంచి సెప్టెంబర్ 13 వరకు జరగాల్సి ఉంది.

యూఈఎఫ్​ఏ నిర్వహించే యూరో 2020, కోపా అమెరికా ఫుట్​బాల్​ టోర్నీలు వాయిదా వేస్తూ నేడు నిర్ణయం తీసుకున్నారు నిర్వాహకులు. ఈ రెండు టోర్నీలు వచ్చే ఏడాది జూన్​ 11 నుంచి జులై 11 మధ్యలో జరగనున్నాయి.