PAK VS NAM T20: కోహ్లీ రికార్డును తిరగరాసిన బాబర్ అజామ్

టీ20 ప్రపంచకప్​(t20 world cup 2021)లో భాగంగా మంగళవారం నమీబియాతో జరిగిన మ్యాచ్​లో విజయం సాధించింది పాకిస్థాన్. తద్వారా సెమీస్ బెర్తును ఖరారు చేసుకుంది. కాగా, ఈ మ్యాచ్​ ద్వారా పలు రికార్డులు నమోదు చేశారు పాక్ ఆటగాళ్లు. అవేంటో చూద్దాం.

టీ20 ప్రపంచకప్(t20 world cup 2021)​లో వరుస విజయాలతో దూసుకెళ్తోంది పాకిస్థాన్. మంగళవారం నమీబియాపై విజయంతో సెమీఫైనల్ బెర్తును ఖరారు చేసుకుంది(పూర్తి కథనం కోసం ఇక్కడ క్లిక్ చేయండి). తద్వారా ఈ సీజన్​లో సెమీస్​లో అడుగుపెట్టిన తొలి జట్టుగా నిలిచింది. కాగా, ఈ మ్యాచ్​ ద్వారా పలు రికార్డులు కొల్లగొట్టారు పాక్ ఆటగాళ్లు. అవేంటో చూద్దాం.

• టీ20 ప్రపంచకప్ టోర్నీల్లో అత్యధిక భాగస్వామ్య పరుగులు చేసిన జాబితాలో పాకిస్థాన్ ఓపెనర్లు బాబర్ అజామ్-మహ్మద్ రిజ్వాన్(babar azam and mohammad rizwan) రెండో స్థానానికి చేరుకున్నారు. 335 పరుగులతో గిల్​క్రిస్ట్-హెడెన్ (2007 ప్రపంచకప్) అగ్రస్థానంలో నిలవగా.. 305 రన్స్​తో బాబర్-రిజ్వాన్ రెండో స్థానంలో కొనసాగుతున్నారు. దిల్షాన్-జయసూర్య (2009 ప్రపంచకప్) 300 పరుగులతో మూడో స్థానంలో ఉన్నారు.
• ఈ ఏడాది టీ20ల్లో అత్యధిక ఓపెనింగ్ సెంచరీ భాగస్వామ్యాలు నెలకొల్పిన జాబితాలో అగ్రస్థానంలో కొనసాగుతున్నారు బాబర్- రిజ్వాన్. వీరిద్దరూ ఇప్పటివరకు 4 శతక భాగస్వామ్యాలు నెలకొల్పారు. బెయిర్​స్టో-మలన్, బవుమా-హెండ్రిక్స్, గప్తిల్-కాన్వే, డికాక్-హెండ్రిక్స్, మలన్-మర్​క్రమ్, నయీమ్-సర్కార్.. ఒక్కో సెంచరీ భాగస్వామ్యం నమోదు చేశారు.
• ఓ క్యాలెండర్ ఇయర్​లో 1000 పరుగులకుపైగా బాగస్వామ్యం నమోదు చేసిన తొలి జోడీగా రికార్డు సృష్టించారు బాబర్-రిజ్వాన్. వీరిద్దరు ప్రస్తుతం 1041 రన్స్​తో ఉన్నారు. ఓబ్రెయిన్-స్టిర్లింగ్ (756), కూపర్-ఓడౌడ్ (662), ధావన్-రోహిత్ (621) తర్వాతి స్థానాల్లో నిలిచారు.
• టీ20 ప్రపంచకప్​ టోర్నీల్లో అత్యధిక శతక భాగస్వామ్యాలు నమోదు చేసిన జాబితాలో గిల్​క్రిస్ట్-హెడెన్(2007), కోహ్లీ-రోహిత్(2014)​ల సరసన నిలిచారు బాబర్-రిజ్వాన్. వీరంతా రెండేసి శతక భాగస్వామ్యాలు నమోదు చేశారు.
• పాకిస్థాన్ ఓపెనర్ మహ్మద్ రిజ్వాన్​ టీ20ల్లో ఓ క్యాలెండర్ ఇయర్​లో 900 పరుగులు చేసిన తొలి క్రికెటర్​గా రికార్డు సృష్టించాడు.
• టీ20ల్లో కెప్టెన్​గా అత్యధిక అర్ధసెంచరీలు చేసిన జాబితాలో కోహ్లీని వెనక్కి నెట్టి అగ్రస్థానానికి చేరుకున్నాడు బాబర్ అజామ్(babar azam vs virat kohli). 14 హాఫ్ సెంచరీలతో (27 ఇన్నింగ్స్​ల్లో) ఇతడు మొదటి స్థానంలో ఉండగా.. కోహ్లీ (13, 44 ఇన్నింగ్స్​ల్లో), ఫించ్ (11), విలియమ్సన్ (11), మోర్గాన్ (9), డుప్లెసిస్ (8) తర్వాతి స్థానాల్లో ఉన్నారు.
• టీ20 ప్రపంచకప్​లో ఒకే సీజన్​లో మూడు అర్ధసెంచరీల నమోదు చేసిన తొలి కెప్టెన్​గానూ రికార్డు సృష్టించాడు బాబర్ అజామ్(babar azam centuries).