ఫిడే ఆన్లైన్ చెస్ ఒలింపియాడ్లో పసిడి సాధించడం ఓ అద్భుతమని అభిప్రాయపడ్డారు భారత దిగ్గజ ఆటగాడు విశ్వనాథన్ ఆనంద్. తొలిసారి ఒలింపియాడ్ పతకం సొంతం చేసుకున్న ఆనంద్.. సోమవారం ఆన్లైన్ మీడియా సమావేశంలో మాట్లాడారు.
"ఈ టోర్నీ ఓ కలలా అనిపిస్తోంది. ఈ స్వర్ణం నాకెంతో ప్రత్యేకమైంది. యువ ప్లేయర్లకూ ఇదో గొప్ప విజయం. పసిడి గెలవడం ఓ అద్భుతమైన సందర్భం. ఈ పతకాన్ని అపురూపంగా దాచుకుంటా. ఈ విజయాన్ని ఊహించలేదు. సర్వర్‌ డౌన్‌ కావడం వల్ల మా తప్పు లేదని బలంగా వాదన వినిపించాం. నిబంధనల ప్రకారం ఇలాంటి సమస్య కారణంతో ఓటమి ఎదురైతే ఆ జట్టు ఆట నుంచి తప్పుకోవాల్సిందే. కానీ మా విషయంలో మాత్రం తప్పు మాది కాదని ఫిడే త్వరగానే గ్రహించి మాకు అనుకూలంగా నిర్ణయం ప్రకటించింది. ఈ విజయంతో భారత్‌లో చెస్‌కు ఆదరణ మరింత పెరుగుతుందని అనుకుంటున్నా. ప్రభుత్వం కూడా ఆ దిశగా చొరవ తీసుకుంటుందనే నమ్మకం ఉంది. ఇప్పుడీ గెలుపుతో తిరిగి క్రీడా అవార్డుల కోసం చెస్ ప్లేయర్లను పరిగణిస్తారని అనుకుంటున్నా"