ఈనాడు క్రీడావిభాగం
యశస్వి జైస్వాల్ (క్రికెట్, వయసు 17)
ముంబయిలో పానీపురి అమ్మి.. పెయింటింగ్‌ పని చేసే నాన్నకు సాయం చేసేవాడు. ఒకవైపు పనులు చేస్తూనే క్రికెట్ నేర్చుకున్నాడు.
పేరొచ్చిందిలా:విజయ్‌ హజారె టోర్నీలో ఝార్ఖండ్‌పై డబుల్‌ సెంచరీ (154 బంతుల్లో 203) చేయడం ద్వారా..
ప్రత్యేకత: దూకుడైన బ్యాట్స్‌మన్‌. అలవోకగా సిక్సర్లు బాదేస్తాడు. విజయ్‌ హజారే టోర్నీలో 25 సిక్స్‌లు కొట్టాడు. ఐపీఎల్‌ వేలంలో ఈ లెఫ్ట్‌ హ్యాండర్‌ని రాజస్థాన్‌ రాయల్స్‌ రూ.2.40 కోట్లకు ఎగరేసుకుపోయింది. అండర్‌-19 ప్రపంచకప్‌ జట్టులోనూ సభ్యుడు.
షెఫాలీ వర్మ (క్రికెట్, వయసు 15)
రోహ్‌తక్‌కు చెందిన ఈ చిన్నది.. 15 ఏళ్లకే భారత జట్టులో చోటు సంపాదించింది.
పేరొచ్చిందిలా: పిన్న వయసులో అంతర్జాతీయ అర్ధసెంచరీ సాధించిన భారత క్రికెటర్‌గా తన ఆరాధ్య ఆటగాడు సచిన్‌ తెందుల్కర్‌ రికార్డు బద్దలు కొట్టింది.
ప్రత్యేకత: సెహ్వాగ్‌ మాదిరిగా ఆరంభం నుంచే బౌలర్లపై విరుచుకుపడుతుంది. భుజ బలంతో భారీ షాట్లు ఆడుతుంది. క్రీజు వదలి ముందుకొచ్చి ఆమె కొట్టే భారీ షాట్లను చూసి తీరాల్సిందే. టీ20తో పాటు మిగిలిన ఫార్మాట్లలోనూ ఆడాలనే లక్ష్యం.
దీపక్ పునియా (రెజ్లింగ్, వయసు 18)
హరియాణాలోని పేద కుటుంబం నుంచి వచ్చాడు. నాన్నతో పాటు పాలు అమ్మేవాడు. సుశీల్‌కుమార్‌ ఆదర్శంగా ఎదిగాడు.
పేరొచ్చిందిలా: ప్రపంచ క్యాడెట్‌ రెజ్లింగ్ ఛాంపియన్‌ కావడం, ఆ తర్వాత 2019లో అరంగేట్రంలోనే ప్రపంచ సీనియర్‌ ఛాంపియన్‌షిప్‌లో రజతం గెలవడం.
ప్రత్యేకత: జూనియర్‌ అయినా ఎలాంటి బెరుకు లేదు.. సీనియర్లలో ఆడిన తొలి టోర్నీలోనే ఐరోపా, ఆసియా ఛాంపియన్లను ఓడించడమే ఇందుకు నిదర్శనం. ఒలింపిక్స్‌లో పతకమే లక్ష్యంగా సాగుతున్నాడు.
దివ్యాంశ్ పన్వర్ (షూటింగ్, వయసు 17)
స్వస్థలం రాజస్థాన్‌లోని జైపుర్‌, 12 ఏళ్లకే గన్‌ పట్టాడు. పబ్‌జీకి బానిస కావడం వల్ల దాని నుంచి మళ్లించడం కోసం షూటింగ్‌ని వ్యాపకంగా ఎంచుకున్నాడు.
పేరొచ్చిందిలా: 2019లో జరిగిన రెండు షూటింగ్ ప్రపంచకప్‌ల్లో నాలుగు స్వర్ణాలు, ఒక రజతం, ఒక కాంస్యం గెలిచాడు.
ప్రత్యేకత: సీనియర్లకు దీటుగా రాణిస్తున్నాడు. 10 మీటర్ల ఎయిర్‌ రైఫిల్‌లో టాప్‌ షూటర్‌గా దూసుకెళ్తున్నాడు. ముఖ్యంగా ఐరోపా షూటర్లకు గట్టిపోటీ ఇస్తున్నాడు. టోక్యో ఒలింపిక్స్‌ బెర్తు సంపాదించాడు.
గుకేశ్ (చెస్, వయసు 13)
చెన్నైకు చెందిన గుకేశ్. ఏడేళ్ల వయసు నుంచే చెస్‌పై పట్టు సంపాదించాడు.
పేరొచ్చిందిలా: 2015లో ఆసియా అండర్‌-9 చెస్ విజేతగా నిలిచిన గుకేశ్.. 2018లో ప్రపంచ అండర్‌-12 క్లాసిక్‌, బ్లిట్జ్‌, ర్యాపిడ్‌ టైటిళ్లు సాధించాడు.
ప్రత్యేకత: 12 ఏళ్ల 7 నెలల 17 రోజుల వయసులో గ్రాండ్‌మాస్టర్‌ హోదా సంపాదించి ఈ ఘనత సాధించిన భారత పిన్న వయస్కుడిగా గుకేశ్ చరిత్ర సృష్టించాడు. ప్రపంచంలో గ్రాండ్‌మాస్టర్‌ హోదా సంపాదించిన రెండో పిన్న వయస్కుడు గుకేశ్.
ఇషాసింగ్‌ (షూటింగ్, వయసు 14)
ఈ హైదరాబాద్‌ అమ్మాయి ఈ ఏడాదే జాతీయ షూటింగ్ తెరపైకి వచ్చింది. సంచలన విజయాలతో దూసుకెళ్తోంది.
పేరొచ్చిందిలా: 13 ఏళ్లకే జాతీయ షూటింగ్ ఛాంపియన్‌షిప్‌లో హీనా సిద్ధు, మను బాకర్‌ లాంటి స్టార్లను వెనక్కి నెట్టి 10 మీటర్ల ఎయిర్‌ పిస్టల్‌ విభాగంలో స్వర్ణం గెలుచుకుంది.
ప్రత్యేకత: షార్ప్‌ షూటర్‌.. తీవ్ర ఒత్తిడిలోనూ లక్ష్యాన్ని ఛేదించగలదు. ఇటీవలే ఆసియా షూటింగ్ ఛాంపియన్‌షిప్‌లో జూనియర్‌ విభాగంలో స్వర్ణం గెలిచిన ఇషా.. సీనియర్‌ విభాగంలో వడివడిగా అడుగులు వేస్తోంది.
ఇసో అల్బెన్ (సైక్లింగ్, వయసు 18)
అండమాన్‌ నికోబార్‌ దీవుల నుంచి వచ్చాడు. అగ్నిమాపక దళంలో పని చేసే నాన్న అల్బన్‌ సైక్లిస్ట్‌ అయినందున ఇసో కూడా అదే బాట పట్టాడు.
పేరొచ్చిందిలా: 2019 ప్రపంచ జూనియర్‌ ట్రాక్‌ ఛాంపియన్‌షిప్‌లో రెండు వ్యక్తిగత రజత, కాంస్య పతకాలతో పాటు టీమ్‌ స్వర్ణాన్ని సాధించడం ద్వారా..
ప్రత్యేకత: ప్రపంచ ట్రాక్‌ సైక్లింగ్ ఛాంపియన్‌షిప్‌లో పతకం సాధించిన తొలి భారత సైక్లిస్ట్‌. ప్రస్తుతం జూనియర్‌లో ప్రపంచ నంబర్‌వన్‌గా ఉన్నాడు. ఒలింపిక్స్‌లో పాల్గొనాలనేది లక్ష్యం.
లాల్రెమ్సియామి (హాకీ, వయసు 18)
మిజోరాంలోని ఒక పేద కుటుంబంలో పుట్టింది. తండ్రి వ్యవసాయ కూలీ. భారత హాకీ జట్టులో కీలక క్రీడాకారిణి.
పేరొచ్చిందిలా: అండర్‌-18 యూత్‌ ఒలింపిక్‌ క్వాలిఫయర్స్‌లో భారత్‌ తరఫున ఏడు గోల్స్‌ చేసి టాప్‌ స్కోరర్‌గా నిలవడం ద్వారా. 2018 ఆసియా ఛాంపియన్‌ట్రోఫీ, ప్రపంచకప్‌లో జట్టు విజయాల్లో కీలకపాత్ర పోషించింది.
ప్రత్యేకత: మైదానంలో మెరుపులా దూసుకెళ్తుంది. బంతిని లాఘవంగా ప్రత్యర్థి నుంచి లాక్కొని.. స్ట్రెకర్లకు అందిస్తుంది. బంతిని డ్రిబుల్‌ చేసుకుంటూ ప్రత్యర్థి వలయాన్ని ఛేదిస్తూ గోల్స్‌ చేసిన సందర్భాలు చాలా ఉన్నాయి.
అర్జున్ భాటి (గోల్ఫ్, వయసు 14)
నోయిడాకు చెందిన ఈ కుర్రాడు ఎనిమిదేళ్లకే గోల్ఫ్‌లోకి వచ్చాడు.
పేరొచ్చిందిలా: 14 ఏళ్లకే ప్రపంచ జూనియర్‌ గోల్ఫ్ టైటిల్‌ను ఖాతాలో వేసుకున్నాడు.
ప్రత్యేకత: ఇప్పటిదాకా 105 టైటిళ్లు ఇతడి ఖాతాలో ఉన్నాయి. నంబర్‌వన్‌పై గురి పెట్టిన ఈ కుర్రాడికి సీనియర్‌ సర్క్యూట్‌లోనూ రాణించాలనే సంకల్పంతో పాటు ఒలింపిక్స్‌లో ఆడాలనే కల ఉంది.
