షూటర్ ఐశ్వరీ ప్రతాప్​ సింగ్​కు ఒలింపిక్స్ బెర్త్

14వ ఆసియన్ షూటింగ్ ఛాంపియన్​షిప్​లో భారత షూటర్ ఐశ్వరీ ప్రతాప్ కాంస్యం దక్కించుకున్నాడు. 449.1 పాయింట్లతో మూడో స్థానంలో నిలిచాడు. 2020 ఒలింపిక్స్​లో బెర్త్ ఖరారు చేసుకున్నాడు.

2020 టోక్యో ఒలింపిక్స్​కు మరో భారత షూటర్ అర్హత సాధించాడు. దోహాలో జరుగుతోన్న 14వ ఆసియన్ ఛాంపియన్​షిప్​లో ఐశ్వరీ ప్రతాప్ సింగ్ తోమర్ కాంస్యం కైవసం చేసుకున్నాడు. విశ్వక్రీడల్లో బెర్త్​ ఖరారు చేసుకున్నాడు. ఇతడితో కలపి ఇప్పటివరకు 13 మంది భారత షూటర్లు.. టోక్యో ఒలింపిక్స్​కు అర్హత సాధించారు.

పురుషుల 50 మీటర్ల రైఫిల్ విభాగంలో ఎనిమిది మంది పోటీపడగా.. 449.1 పాయింట్లు సాధించి మూడో స్థానంలో నిలిచాడు ప్రతాప్ సింగ్. కొరియాకు చెందిన కిమ్ జోంగ్యూమ్(459.9) స్వర్ణం గెలిచాడు. చైనా క్రీడాకారుడు జోంగావో(459.1) వెండి పతకం సాధించాడు.

2012 లండన్ ఒలింపిక్స్​లో భారత తరఫున షూటింగ్ విభాగంలో 11 మంది పోటీపడ్డారు. 2016 రియోలో 12 మంది పాల్గొన్నారు. టోక్యో విశ్వక్రీడల కోసం 13 మంది అర్హత సాధించారు.

ఇదీ చదవండి: నేను విరాట్ కోహ్లీని: వార్నర్ కూతురు ఐవీ