'దక్షిణాఫ్రికా బోర్డు సంక్షోభంలో జోక్యం చేసుకోం'

పాలన సంక్షోభం నెలకొన్న దక్షిణాఫ్రికా క్రికెట్​లో ప్రస్తుతానికి తాము జోక్యం చేసుకోమని అంతర్జాతీయ క్రికెట్ మండలి (ఐసీసీ) స్పష్టం చేసింది. ఈ ప్రకటన దక్షిణాఫ్రికా ఆటగాళ్లకు ఉపశమనం కలిగించింది.

క్రికెట్‌ దక్షిణాఫ్రికా (సీఎస్‌ఏ) పరిపాలన సంక్షోభంలో ప్రస్తుతానికి తమ జోక్యం ఉండదని ఐసీసీ స్పష్టంచేసింది. ప్రభుత్వ జోక్యంతో సీఎస్‌ఏపై ఐసీసీ నిషేధం విధిస్తే భారత్‌లో జరిగే టీ20 ప్రపంచకప్‌లో దక్షిణాఫ్రికా పాల్గొనలేదంటూ ముగ్గురు సారథులు డీన్‌ ఎల్గర్‌, తెంబా బవుమా, డేన్‌ వాన్‌ నీకెర్క్‌లు సంయుక్త ప్రకటనలో ఆందోళన వ్యక్తంజేశారు. ఈనేపథ్యంలో మంగళవారం ఐసీసీ ప్రకటన దక్షిణాఫ్రికా ఆటగాళ్లకు ఉపశమనం కలిగించింది.

సమస్యల పరిష్కారం కోసం ప్రభుత్వాలతో కలిసి పనిచేసేలా సభ్యుల్ని ఐసీసీ ప్రోత్సహిస్తుంది. ప్రభుత్వ జోక్యం అన్ని సార్లు సమస్యాత్మకం కాబోదు. ఐసీసీ జోక్యం చేసుకోవాలంటే సభ్య దేశం నుంచి అధికారికంగా ఫిర్యాదు అవసరం. అదే జరిగితే వాస్తవాల ఆధారంగా పరిస్థితిని అంచనా వేసి తగిన చర్యలు తీసుకుంటాం అని ఐసీసీ పేర్కొంది.

ఇదీ చదవండి:రైజర్స్xకింగ్స్: గెలుపు ఆకలి తీరేదెవరికో!

గత 18 నెలలుగా సీఎస్‌ఏలో పరిపాలన సంక్షోభం కొనసాగుతుంది. ఈ కాలంలో సీఎస్‌ఏ అత్యున్నత అధికారుల్లో కొందరిపై వేటుపడగా.. మరికొందరు రాజీనామా చేశారు. సంక్షోభ పరిష్కారం కోసం శనివారం జరిగిన సీఎస్​ఏ సభ్యుల మండలి (ఎంసీ), మధ్యంతర బోర్డు (ఐబీ) ప్రత్యేక సర్వసభ్య సమావేశం (ఎస్​జీఎం) అసంపూర్తిగా ముగిసింది. సీఎస్​ఏ సంక్షోభ నివారణకు తన జోక్యం అవసరమంటూ క్రీడల మంత్రి నాతి ఎంతెత్వా సంకేతాలిచ్చారు. ప్రభుత్వం జోక్యం చేసుకుంటే దక్షిణాఫ్రికాపై నిషేధం పడే ప్రమాదముందంటూ ముగ్గురు కెప్టెన్లు ఆందోళన వ్యక్తంజేయడం వల్ల ఐసీసీ స్పష్టతనిచ్చింది.

ఇదీ చదవండి:చెన్నై జోరును కోల్​కతా నిలువరించేనా?