The Ashes 2023 : క్రికెట్‌కు పుట్టినిల్లు ఇంగ్లాండ్ వేదికగా మరో కీలక సమరానికి సమయం ఆసన్నమైంది. శుక్రవారం నుంచి ఎడ్జ్‌బాస్టన్‌ వేదికగా ఇంగ్లాండ్- ఆస్ట్రేలియా జట్ల మధ్యఐదు టెస్టుల యాషెస్ సిరీస్ ప్రారంభం కానుంది. ఈ సిరీస్‌తో ఇరు జట్లకూ ప్రపంచ టెస్టు ఛాంపియన్‌షిప్‌ మూడో సీజన్‌ కూడా మొదలుకానుంది. గత యాషెస్ సిరీస్‌ను ఆసీస్ గెలుచుకోగా.. సొంతగడ్డపై తిరిగి దానిని దక్కించుకోవాలని ఇంగ్లాండ్ పట్టుదలతో ఉంది. అయితే యాషెస్ సిరీస్ అనగానో కొన్ని ప్రత్యేకమైన విషయాలు గురొస్తాయి. అందులో షేన్ వార్న్.. బాల్ ఆఫ్ ది సెంచరీ ఒకటి. ఇంగ్లాండ్తో 1993 యాషెస్ సిరీస్లో జరిగిన ఆ అద్భుతాన్ని అలా ఓ సారి గుర్తు చేసుకుందాం..
వార్న్ బాల్ ఆఫ్ ది సెంచరీ..
Ball of The Century: లెగ్‌స్పిన్‌తో ప్రపంచాన్ని తనవైపు తిప్పుకున్న షేన్‌వార్న్‌ బంతితో మాయ చేశాడు. ముఖ్యంగా లెగ్‌స్టంప్‌కు ఆవల బంతి వేస్తూ ఆఫ్ స్టంప్‌ను ముద్దాడేలా దాన్ని స్పిన్‌ చేయడంలో వార్న్ దిట్ట. అందుకే అతడు వేసిన ఓ డెలివరీ "శతాబ్దపు మేటి బంతి"గా చరిత్రలో నిలిచిపోయింది. ఇంగ్లాండ్తో 1993 యాషెస్ సిరీస్లో తొలి టెస్టు ఆ అద్భుతానికి వేదికైంది. అప్పటికీ వార్న్‌కు 11 టెస్టుల అనుభవం మాత్రమే ఉంది. పైగా అది అతనికి తొలి యాషెస్ టెస్టు.
మొదట బ్యాటింగ్‌ చేసిన ఆసీస్ తొలి ఇన్నింగ్స్‌లో 289 పరుగులు చేసింది. ఇంగ్లాండ్ తొలి ఇన్నింగ్స్‌లో ఓ వికెట్‌ పడ్డాక స్పిన్‌ను సమర్థంగా ఆడతాడనే పేరున్న మైక్‌ గాటింగ్‌ క్రీజులోకి వచ్చాడు. అప్పుడే వార్న్ తొలి ఓవర్‌ వేసేందుకు సిద్ధమయ్యాడు. నెమ్మదిగా రనప్‌ చేసి వచ్చి మొదటి బంతి వేశాడు. నేరుగా వచ్చేలా కనిపించిన ఆ బంతి లెగ్‌స్టంప్‌ లైన్‌కు కొన్ని అంగుళాల ఆవల పడింది. ప్యాడు, బ్యాట్‌ను అడ్డుపెట్టి దాన్ని ఎదుర్కోవాలని గాటింగ్‌ చూశాడు. కానీ అనూహ్యంగా స్పిన్‌ అయిన ఆ బంతి.. ప్యాడు, బ్యాట్‌ను దాటి వెళ్లి ఆఫ్‌స్టంప్‌ను తాకింది. ఏం జరిగిందో తెలీక గాటింగ్‌ ఆశ్చర్యంతో పిచ్‌ వైపు చూసి పెవిలియన్‌ బాట పడ్డాడు.
బాడీ లైన్ టెక్నిక్..
Body Line Techique : అది 1932-33 యాషెస్ సిరీస్. ఆస్ట్రేలియన్ సూపర్ స్టార్ డాన్ బ్రాడ్‌మన్ ప్రపంచంలోనే అగ్రస్థానంలో ఉన్నాడు. ప్రపంచవ్యాప్తంగా తన ఇన్నింగ్స్తో అలరిస్తున్నాడు. డాన్ బ్రాడ్‌మాన్ ఇంగ్లాండ్‌కు పెను ముప్పులా ఆడే వాడు. అయితే ఆసీస్ బ్యాటర్లను కట్టడి చేసేందుకు ఇంగ్లాండ్ 'బాడీలైన్' టెక్నిక్‌ను ప్రయోగించింది.
ఇంగ్లాండ్ బౌలర్లు.. ప్రత్యర్థి బ్యాటర్ల శరీరాలను తాకేలా బంతులు సంధించారు. ఆ సమయంలో బ్యాటర్లు తమ ఛాతీ, తలను బ్యాట్తో రక్షించుకునే క్రమంలో లెగ్ సైడ్‌లో నిలబడి ఉన్న ఫీల్డర్‌లు క్యాచ్ పట్టుకునే ప్రయత్నించారు. ఆ విషయంలో ఇంగ్లాండ్ బౌలర్లు సక్సెస్ అయ్యారు. కొంతమంది ఆస్ట్రేలియా ఆటగాళ్లు మైదానంలో గాయాలపాలయ్యారు. ఆ తర్వాత మేరీల్‌బోన్ క్రికెట్ క్లబ్ (MCC) ఈ టెక్నిక్లో చాలా మార్పులు చేసింది.
