ఇదేమైనా క్లబ్​ క్రికెట్టా? : విరాట్​ కోహ్లీ

గురువారం ఆర్​సీబీ- ముంబయి ఇండియన్స్ మధ్య జరిగిన మ్యాచ్​లో చివరి బంతి మలింగ నోబాల్ వేశాడు. ఈ బంతిని అంపైర్ నోబాల్​గా ప్రకటించలేదు. దీనిపై బెంగళూరు కెప్టెన్ విరాట్ కోహ్లీ అసంతృప్తి వ్యక్తం చేశాడు.

బెంగళూరు- ముంబయి మధ్య గురువారం జరిగిన మ్యాచ్​లో విరాట్​కోహ్లీ అంపైర్లపై అసంతృప్తి వ్యక్తం చేశాడు. ఇన్నింగ్స్ చివరి బంతిని లసిత్ మలింగ నోబాల్ వేయగా, అంపైర్ దీనిని ప్రకటించలేదు. ఈ విషయంపై ఘాటుగా స్పందించిన విరాట్.. తాము ఐపీఎల్​లో ఆడుతున్నామని, క్లబ్ క్రికెట్​లో కాదని అంపైర్​ ఎస్​. రవిపై విమర్శలు చేశాడు.

"ఇది చాలా దారుణం. మేము క్లబ్​ స్థాయి క్రికెట్ కాదు, ఐపీఎల్ ఆడుతున్నాం. అంపైర్లు సరిగ్గా గమనించి ఉండాల్సింది. అది నో బాల్​ అని స్పష్టంగా కనిపిస్తోంది. ఇలాంటి కీలకాంశాలే గెలుపోటములను నిర్ణయిస్తాయి. కాసేపు నాకు ఏం జరిగిందో అర్థం కాలేదు. అంపైర్లు కాస్త జాగ్రత్తగా వ్యవహరించాల్సింది" --విరాట్ కోహ్లీ, బెంగళూరు సారథి.

విరాట్​కు ముంబయి కెప్టెన్ రోహిత్ శర్మ మద్దతు పలికాడు. అంపైరింగ్ విషయంపై రోహిత్ కూడా విమర్శించాడు. 19వ ఓవర్లో బుమ్రా వేసిన బంతి వైడ్​ కాకాపోయినా అంపైర్​ వైడ్​గా ప్రకటించాడని ముంబయి సారథి అసంతృప్తి వ్యక్తం చేశాడు.

బెంగళూరు వేదికగా జరిగిన ఈ మ్యాచ్​లో మొదట బ్యాటింగ్ చేసిన ముంబయి ఇండియన్స్​ 187 పరుగుల లక్ష్యం నిర్దేశించింది. అనంతరం బ్యాటింగ్ మొదలుపెట్టిన ఆర్​సీబీ 20 ఓవర్లలో 181 పరుగులు చేసి పరాజయం చెందింది. చివరి బంతికి 7 పరుగులు అవసరమవగా మలింగ నో బాల్ వేశాడు. కానీ అంపైర్ నో బాల్​గా ప్రకటించపోయేసరికి సర్వత్రా విమర్శలు వెల్లువెత్తుతున్నాయి.