Injured Players Before World Cup : ప్రపంచకప్​ వేళ.. గాయాల గోల.. మెగాటోర్నీకి ఆ స్టార్ బౌలర్ దూరం!

Injured Players Before World Cup : 2023 ప్రపంచకప్​ టోర్నమెంట్ సమీపిస్తున్న వేళ.. ఆయా జట్ల ప్లేయర్లను గాయాలు వెంబడిస్తున్నాయి. అందులో కొందరు ప్రారంభ మ్యాచ్​లకు దూరం కాగా.. మరి కొందరు పూర్తి టోర్నీ నుంచే తప్పుకునే ప్రమాదం ఉంది. వారెవరో చూసేద్దాం.

Injured Players Before World Cup :మరో 19 రోజుల్లో ప్రారంభమయ్యే వరల్డ్​కప్​కోసం ప్రపంచంలోని మేటి జట్లు సన్నద్ధమవుతున్నాయి. నాలుగేళ్లకొకసారి వచ్చే ఈ మెగా టోర్నీలో టైటిల్ నెగ్గాలని ఆయా జట్లు సర్వశక్తులూ ఒడ్డుతున్నాయి. అయితే ఇందులో పాల్గొనే దేశాల్లో కొన్ని జట్లు.. ప్రస్తుతం ద్వైపాక్షిక సిరీస్​ల్లో ఆడుతున్నాయి. ప్రపంచకప్​ కంటే ముందు ఈ పర్యటనలు తమతమ ప్లేయర్లకు ప్రాక్టీస్​లా ఉపయోగపడతాయని అనుకున్న వారికి.. కొత్త సమస్యలు వస్తున్నాయి. ఆయా జట్లలో కీలక ప్లేయర్లు ఆట మధ్యలో గాయాల బారిన పడుతున్నారు. దీంతో కొందరు ప్రపంచకప్​లోని కొన్ని మ్యాచ్​లకు అందుబాటులో ఉండకపోగా.. మరికొందరు పూర్తి టోర్నీకే దూరం అయ్యే ప్రమాదం ఏర్పడింది. అయితే ఈ జాబితాలో ఉన్న ఆయా దేశాల ప్లేయర్లెవరంటే..

1. నజీమ్ షా (పాకిస్థాన్).. ఈ లిస్ట్​లో పాకిస్థాన్ పేసర్ నజీమ్ షా చేరాడు. 2023 ఆసియా కప్​ సూపర్​ 4లో భారత్​తో జరిగిన మ్యాచ్​లో షా.. గాయపడ్డాడు. ఫీల్డింగ్ చేస్తుండగా అతడి భుజానికి గాయమైంది. దీంతో షా.. రానున్న ప్రపంచకప్​నకు పూర్తిగా అందుబాటులో ఉండడని తెలుస్తోంది.
2. టిమ్ సౌథీ (న్యూజిలాండ్).. న్యూజిలాండ్ ప్రస్తుతం ఇంగ్లాండ్​లో పర్యటిస్తోంది. ఆ పర్యటనలో కివీస్.. ఆతిథ్య జట్టు ఇంగ్లాండ్​తో 4 టీ20, 4 వన్డే మ్యాచ్​ల సిరీస్​ పూర్తయ్యింది. అయితే తాజాగా శుక్రవారం నాటి మ్యాచ్​లో కివీస్ స్టార్ పేసర్ టిమ్ సౌథీ గాయపడ్డాడు. ఫీల్డింగ్ చేస్తున్న సమయంలో అతడి కుడిచేతి బొటన వేలుకు గాయమైంది. దీంతో అతడు 2023 వరల్డ్ కప్​నకు అందుబాటులో ఉండేది డౌటే.
3. ట్రావిస్ హెడ్ (ఆస్ట్రేలియా).. సౌతాఫ్రికా-ఆస్ట్రేలియామధ్య ద్వైపాకిక్ష సిరీస్ జరుగుతోంది. ఈ సిరీస్​లో భాగంగా శుక్రవారం జరిగిన మ్యాచ్​లో ఆసీస్ స్టార్ బ్యాటర్ ట్రావిస్ హెడ్​ గాయపడ్డాడు. బ్యాటింగ్ చేస్తుండగా బంతి అతడి చేతిని బలంగా తాకింది. దీంతో అతడు మైదానాన్ని వీడాల్సి వచ్చింది. అయితే ఆసీస్​కు ఎంతో కీలకమైన హెడ్.. ప్రపంచకప్​కు ముందు ఇలా గాయపడడం ఆ జట్టును తీవ్రంగా కలవరపెడుతోంది.
4. శ్రేయస్ అయ్యర్ (భారత్).. కొంతకాలం గ్యాప్ తర్వాత జట్టులోకి వచ్చిన టీమ్ఇండియా స్టార్ బ్యాటర్ శ్రేయస్ అయ్యర్.. ఆసియా కప్​లో పాకిస్థాన్​తో తొలి మ్యాచ్​లో బరిలోకి దిగాడు. కానీ ఈ మ్యాచ్​లో అతడు పెద్దగా ప్రభావం చూపలేదు. ఇక ఆ తర్వాత మ్యాచ్​ల్లో అయ్యర్.. జట్టుకు దూరం అయ్యాడు. అయితే అతడు మళ్లీ వెన్నునొప్పితో బాధపడుతున్నట్లు తెలుస్తోంది. అయితే వరల్డ్ కప్ సమయానికి అయ్యర్ కోలుకునే ఛాన్స్​ తక్కువగా ఉన్నట్లు తెలుస్తోంది.
5. మహీష తీక్షణ(శ్రీలంక)..శ్రీలంక ప్లేయర్ మహీష తీక్షణ 2023 ఆసియా కప్​ సూపర్​ 4లో పాకిస్థాన్​తో మ్యాచ్​లో గాయపడ్డాడు. ఆ మ్యాచ్​లో అతడి భుజానికి గాయమైంది. దీంతో అతడు ఆదివారం జరిగే ఫైనల్ మ్యాచ్​కు దూరమయ్యాడు. మరో 20 రోజుల్లో అతడు పూర్తిగా కోలుకోకపోతే మెగాటోర్నీలోనూ ఆడటం కష్టం.