IND vs SA: టీమ్ఇండియా ఇప్పుడు ఒత్తిడిలో కూరుకుపోయిందని దక్షిణాఫ్రికా పేసర్ లుంగి ఎంగిడి అన్నాడు. గురువారం అశ్విన్‌ బౌలింగ్‌లో ఆ జట్టు సారథి తొలుత ఎల్బీడబ్ల్యూగా ఔటైనట్లు అంపైర్‌ ప్రకటించినా రివ్యూలో బంతి వికెట్లకుపై నుంచి వెళ్తుందని నాటౌట్‌గా పేర్కొన్నారు. దీంతో విరాట్‌ తీవ్ర అసహనం వ్యక్తం చేశాడు. వైస్‌ కెప్టెన్ కేఎల్‌ రాహుల్‌, స్పిన్నర్‌ అశ్విన్‌.. స్టంప్‌ మైక్‌ల వద్ద పలు తీవ్ర వ్యాఖ్యలు చేశారు. ఈ నేపథ్యంలోనే ఎంగిడి స్పందించాడు.
"వాళ్లు ఇలా స్పందించడం ద్వారా ఎంత ఒత్తిడికి గురువుతున్నారో, ఎంత అసహనానికి లోనయ్యారో తెలుస్తోంది. కొన్నిసార్లు ఇలాంటి వాటితో ఆయా జట్లు లబ్ధిపొందుతాయి. ఎవరూ తమ భావోద్వేగాలను తీవ్రంగా తీవ్రంగా ప్రదర్శించాలనుకోరు. కానీ, ఇక్కడ టీమ్ఇండియా ఎమోషన్స్‌ చాలా కనిపించాయి. దీంతో వాళ్లు తీవ్ర ఒత్తిడికి గురుతున్నారని అర్థమవుతోంది" అన్నాడు ఎంగిడి.
"ఎల్గర్, కీగన్‌ సాధించిన భాగస్వామ్యం మా జట్టుకెంతో ఉపయోగకరం. దాంతో వాళ్లు ఆ భాగస్వామ్యానికి తెరదించాలనుకున్నారు. ఈ నేపథ్యంలోనే వాళ్ల భావోద్వేగాలు అలా బయటపడ్డాయి. ప్రతి ఒక్కరూ ఏదో ఒకరకంగా స్పందిస్తారు. అయితే, ఆ సమయంలో టీమ్ఇండియా ఆటగాళ్లు ఎలా ఉన్నారో అదే మనం చూశాము" అని ఎంగిడి చెప్పుకొచ్చాడు.