ICC World Cup History : ప్రతి నాలుగేళ్లకోసారి జరిగే ప్రపంచకప్ కోసం క్రికెట్ లవర్స్ ఎంతో ఉత్కంఠగా ఎదురుచూస్తుంటారు. ఆ ట్రోఫీని ముద్దాడాలని ప్రతీ జట్టు ఎన్నో కలలు కంటుంది. అయితే పది జట్లు బరిలోకి దిగితే.. చివరకు ఒకరికే టైటిల్‌ దక్కుతుంది. ఇక రానున్న ఈ మెగా టోర్నీకి భారత్ వేదికైంది. అహ్మదాబాద్‌ వేదికగా అక్టోబర్‌ 5న ఢిపెండింగ్‌ ఛాంపియన్స్‌ ఇంగ్లాండ్- రన్నరప్‌ న్యూజిలాండ్‌ మధ్య జరగనున్న మ్యాచ్‌తోనే వన్డే ప్రపంచకప్ ప్రారంభం కానుంది.
వరల్డ్ కప్ టూర్లో భాగంగా ప్రపంచాన్ని చుట్టొస్తున్న ప్రపంచ కప్ తాజాగా హైదరాబాద్‌లో సందడి చేసింది. రామోజీ ఫిల్మ్ సిటీ, చార్మినార్‌, ఇన్ఆర్బిట్ మాల్, ఉప్పల్ స్టేడియం, హుస్సేన్‌ సాగర్‌ లాంటి ప్రముఖ సందర్శనీయ స్థలాల్లో ఈ ట్రోఫీ కనువిందు చేసింది. అయితే ఛాంపియన్స్‌గా నిలిచే జట్టుకు బహుకరించే ట్రోఫీ హిస్టరీ, దాన్ని ఎవరు రూపొందిచారన్న విషయాల గురించి అందరికీ తెలుసుకోవాలని ఉంటుంది. ఈ క్రమంలో అటువంటి ఇంట్రెస్టింగ్ విశేషాల మీకోసం.
ప్రుడెన్షియల్ వరల్డ్కప్(1975) :వన్డే ప్రపంచకప్ ప్రయాణం 1975లో మొదలైంది. ఇంగ్లాండ్ వేదికగా జరిగిన తొలి వన్డే వరల్డ్‌కప్‌ను వెస్టిండీస్‌ కైవసం చేసుకుని రికార్డుకెక్కింది. అయితే ఈ టోర్నీ ఐసీసీ ఆధ్వర్యంలో జరిగినప్పటికీ దానికి 'ప్రుడెన్షియల్ వరల్డ్కప్' అని పేరు పెట్టారు. ప్రుడెన్షియల్ అనే బీమా కంపెనీ తొలి వరల్డ్కప్ స్పాన్సర్గా వ్యవహరించినందున ఆ కప్కు ఆ పేరు పెట్టారు.
ఇక మొట్టమొదటిగా ప్రపంచ కప్.. వెండి, బంగారం కలయికతో రూపొందింది. ట్రోఫీ పైభాగంలో బంగారు పూతతో తయారు చేసిన ఓ క్రికెట్ బాల్ను అమర్చారు. 1979, 1983 ప్రపంచకప్ను కూడా ప్రుడెన్షియల్ కంపెనీనే స్పాన్సర్ చేసింది. అయితే 1979 వన్డే ప్రపంచకప్ను రెండో సారి విండీస్‌ కైవసం చేసుకుగా.. 1983 కప్ను భారత జట్టు ముద్దాడింది.
రిలయన్స్ ట్రోఫీ(1987) :ఆ తర్వాత 1987 వరల్డ్‌కప్కు రిలయన్స్ ఇండస్ట్రీస్ సరికొత్త టైటిల్‌ స్పాన్సర్గా ఎంపికైంది. దీంతో ఆ ఏడాది మెగా ఈవెంట్‌ను రిలయన్స్ కప్‌గా పిలిచేవారు. ఇక ఈ కప్ కూడా వెండి, బంగారం కలయికతో రూపొందింది. ప్రుడెన్షియల్ కంపెనీలా రిలయన్స్ కూడా ట్రోఫీలో క్రికెట్ బాల్ను అమర్చింది. ఆ ఏడాది ఆస్ట్రేలియా జట్టు తొలి వరల్డ్‌కప్‌ను అందుకుంది.
బెన్సన్ అండ్‌ హెడ్జెస్ వరల్డ్ కప్ :అయితే రిలయన్స్ కేవలం ఒక్క వరల్డ్ కప్కు మాత్రమే టైటిల్‌ స్పాన్సర్గా వ్యవహరించింది. ఆ తర్వాత 1992 ప్రపంచకప్‌కు బెన్సన్ అండ్‌ హెడ్జెస్ అనే బ్రిటీష్‌ సిగిరెట్‌ కంపెనీ టైటిల్‌ను స్పాన్సర్గా వచ్చింది. దీంతో ఆ ఏడాది టోర్నీని బెన్సన్ అండ్‌ హెడ్జెస్ వరల్డ్కప్ అని పిలిచేవారు. ఆ ఏదాడి ఆ కప్ను పాకిస్థాన్ జట్టు కైవసం చేసుకుంది.
విల్స్ వరల్డ్కప్(1996) :బెన్సన్ అండ్‌ హెడ్జెస్ కంపెనీ తర్వాత.. 1996 వన్డే ప్రపంచకప్‌కు విల్స్ అనే మరో సిగిరెట్‌ కంపెనీ టైటిల్‌ స్పాన్సరైంది. దీంతో ఆ టోర్నీని విల్స్ వరల్డ్ కప్ అని పిలిచేవారు. ఇక ఈ విల్స్ కప్ను శ్రీలంక గెలుచుకుంది. అయితే 1996 ప్రపంచ కప్ తర్వాత ఐసీసీ ఓ కీలక నిర్ణయం తీసుకుంది. 1999 వరల్డ్ కప్ కోసం ఆ సంస్థ ఓ కొత్త ట్రోఫీని ప్రవేశ పెట్టింది. దాన్ని తయారు చేసే బాధ్యతలను లండన్‌లోని గారార్డ్ అనే ప్రముఖ జ్యుయలరీ సంస్థకు అప్పజెప్పింది. ఆ కప్ను రూపొందించేందుకు రెండు నెలల సమయం పట్టింది. వెండితో తయారైన ఈ ట్రోఫీకి పైనుంచి బంగారు పూత పూశారు.
సుమారు 60 సెంటీమీటర్ల ఎత్తుతో ఉన్న ఆ ట్రోఫీ పైన గోల్డెన్ కలర్లో ఓ గ్లోబ్ను అమర్చారు. దానికి సపోర్ట్‌గా మూడు సిల్వర్ కాలమ్స్ ఉంటాయి. ఆ కాలమ్‌లు స్టంప్‌లు, బెయిల్స్‌ రూపొంలో నిలువ వరుసగా ఉంటాయి. బ్యాటింగ్, బౌలింగ్, ఫీల్డింగ్‌ ఇలా మూడు అంశాలను ప్రతిబింబించేలా ఈ ట్రోఫీని తయారు చేశారు. ఇక పైనున్న గ్లోబ్ క్రికెట్ బంతిని సూచిస్తుంది. అయితే ఈ ట్రోఫీని ప్రత్యేక కొలతలతో రూపొందించారు. సుమారు 11 కిలోల బరువు ఉండే ఈ కప్ ఏ కోణం నుంచి చూసిన ట్రోఫీ ఒకే విధంగా ఉంటుంది.
ధర ఎంతంటే?
ICC World Cup Price :క్రికెట్ లవర్స్ ప్రతిష్టాత్మకంగా భావించే ఈ ప్రపంచ కప్ ట్రోఫీ తయారీకి ఐసీసీ 40వేల పౌండ్లు ఖర్చు చేసింది. అంటే ప్రస్తుత భారత్ ధరల ప్రకారం దీని ధర సుమారు రూ.30,85,320. వరల్డ్ కప్ విజేతగా నిలిచిన జట్టుకు ఈ ట్రోఫీని అందిస్తారు. ఇక విన్నర్ జట్టు పేరును ట్రోఫీ కింద ముద్రిస్తారు. అయితే ఒరిజినల్ ట్రోఫీని గెలిచిన వారికి ఇవ్వరు. దాన్ని పోలిన నకలును మాత్రమే అందజేస్తారు. ఒరిజనల్ ట్రోఫీని ఐసీసీ.. దుబాయ్‌లోని తమ ఆఫీస్లో ఉంచుతుంది.
