Next Team India Test Captain : నాలుగు విజయాలు.. రెండు ఓటములు.. ఒక డ్రా.. టీమ్ఇండియా కెప్టెన్‌గా రోహిత్ శర్మ బాధ్యతలు తీసుకున్న తర్వాత జరిగిన సిరీస్‌ల్లో ఫలితాలు ఇవే.. ఇంత మంచి రికార్డు ఉన్న రోహిత్‌కు ఇటీవలే ముగిసిన ప్రపంచ టెస్టు ఛాంపియన్‌షిప్‌లో టీమ్ఇండియా మరోసారి రన్నరప్‌కే పరిమితం అవడం మింగుడుపడని అంశం. విరాట్‌ కోహ్లీ నుంచి కెప్టెన్సీ తీసుకున్న రోహిత్ టీమ్ఇండియాను టెస్టుల్లో నెంబర్‌వన్‌ పొజిషన్‌లో ఉంచినప్పటికీ ఛాంపియన్‌గా నిలబెట్టడంలో మాత్రం విఫలమయ్యాడు.
ఆసీస్‌తో జరిగిన డబ్ల్యూటీసీ ఫైనల్లో 209 పరుగుల తేడాతో భారత్ ఓటమి పాలైన తర్వాత రోహిత్ కెప్టెన్సీపై విమర్శలు వచ్చాయి. అయితే వయసు రీత్యా 36 ఏళ్లు ఉన్న రోహిత్ మరో డబ్ల్యూటీసీ ఫైనల్ ఆడతాడన్నది ఇప్పుడే చెప్పలేం. 2025లో జరిగే మూడో డబ్ల్యూటీసీ ఫైనల్ వరకు రోహిత్ వయస్సు 38కు చేరుకుంటుంది. ఇప్పుడే సరైన ఫిట్‌నెస్‌ లేక ఇబ్బంది పడుతున్న రోహిత్ అప్పటివరకు కొనసాగడం కష్టమే. ఒకవేళ ఆడినా అతను కెప్టెన్‌గా మాత్రం ఉండకపోవచ్చు. అందుకే రానున్న రెండేళ్లలో జరిగే టెస్టు సిరీస్‌లకు రోహిత్ కెప్టెన్‌గా ఉండకపోతే ఎవరు కెప్టెన్ కావాలనే విషయం అభిమానుల మదిలో ఉంది.
ఇప్పటికిప్పుడు ఇదే ప్రశ్న అభిమానులకు వేస్తే అందరినోటి నుంచి వచ్చే పేరు అజింక్యా రహానె.. కాదంటే రవీంద్ర జడేజా లేదా రవిచంద్రన్‌ అశ్విన్‌. విరాట్‌ కోహ్లీకి అవకాశం ఉన్నా అతను మళ్లీ కెప్టెన్‌గా బాధ్యతలు తీసుకుంటాడా అంటే సందేహమే. ఇవన్నీ పక్కనబెడితే.. రోహిత్ తర్వాత టీమ్ఇండియా టెస్టు కెప్టెన్‌గా ఎవరైతే బాగుంటుందని Google AI(గూగుల్ ఏఐ)ని అడిగితే ఎవరు ఊహించని పేర్లు వెల్లడించింది.