మొతేరా వేదికగా బుధవారం నుంచి ఇంగ్లాండ్తో జరగనున్న డే/నైట్ మ్యాచ్కు టీమ్ఇండియా సిద్ధమవుతోంది. ఈ సిరీస్లో గెలుపొంది.. ప్రపంచ టెస్టు ఛాంపియన్షిప్కు చేరుకోవాలని కోహ్లీసేన కృషి చేస్తోంది. అయితే, దాని కోసం మిగిలిన రెండు మ్యాచ్ల్లోనూ గెలవాలని ప్రయత్నిస్తున్నట్లు విరాట్ మీడియాకు తెలిపాడు.
"ఒక మ్యాచ్ డ్రాగా ముగించి, మరొకటి విజయం సాధించాలని మేం భావించట్లేదు. రెండు మ్యాచ్‌లూ గెలవాలని ప్రయత్నిస్తున్నాం. ఫలితం గురించి తర్వాత ఆలోచిస్తాం."
- విరాట్ కోహ్లీ, టీమ్ఇండియా కెప్టెన్
ఇంగ్లాండ్తో జరుగుతోన్న టెస్టు సిరీస్‌ను భారత్ 2-1 లేదా 3-1తో గెలిస్తే ఛాంపియన్షిప్ ఫైనల్‌కు అర్హత సాధిస్తుంది. ప్రస్తుతం భారత్, ఇంగ్లాండ్ చెరో విజయం సాధించాయి.
అయితే, ఆస్ట్రేలియాతో జరిగిన గత డే/నైట్ టెస్టులో టీమిండియా 36 పరుగులకు కుప్పకూలింది. ఆ ఫలితం ఏమైనా ప్రభావితం చూపిస్తుందా అని అడిగిన ప్రశ్నకు.. "45 నిమిషాల పేలవమైన ఆటతో అలా జరిగింది. అలాంటి చేదు జ్ఞాపకమే ఇంగ్లాండ్‌కు కూడా ఉంది" అని అన్నాడు. 2018లో న్యూజిలాండ్‌తో జరిగిన డే/నైట్ టెస్టులో ఇంగ్లాండ్ 58 పరుగులకు ఆలౌటైంది.
ఇదీ చూడండి:'అశ్విన్ వరల్డ్ క్లాస్ ప్లేయర్.. పంత్ నైపుణ్య ఆటగాడు'