టీమిండియా మాజీ కెప్టెన్, వికెట్ కీపర్ మహేంద్ర సింగ్ ధోని ఆదివారం 38వ వసంతంలోకి అడుగుపెట్టాడు. పుట్టినరోజు వేడుకలను కుటుంబసభ్యులు, సన్నిహితుల మధ్య జరుపుకున్నాడు.
ధోని చేయి పట్టుకుని కేక్ కట్ చేయించింది కూతురు జివా. టీమిండియా సభ్యులు కేదార్ జాదవ్, హర్డిక్ పాండ్య ధోని ముఖానికి కేక్ పూసి సందడి చేశారు. ఈ వేడుకకు సంబంధించిన ఫోటోలను ధోని సతీమణి సాక్షి సోషల్ మీడియాలో షేర్ చేసింది.
సామాజిక మాధ్యమాల్లో మహేంద్రుడికి పుట్టినరోజు శుభాకాంక్షలు వెల్లువెత్తుతున్నాయి. అభిమానులు, ఆటగాళ్లు, వేర్వేరు రంగాల ప్రముఖులు సోషల్ మీడియా వేదికగా బర్త్డే విషెస్ చెబుతున్నారు.
ట్విట్టర్లో తరచూ తన ఫన్నీ మెసేజ్లో వ్యంగ్యాస్త్రాలు సంధించే సెహ్వాగ్.. ధోనీకి తనదైన శైలిలో పుట్టినరోజు శుభాకాంక్షలు తెలిపాడు. "ప్రపంచంలో ఏడు దేశాలు, వారానికి ఏడు రోజులు, రెయిన్బోలో ఏడు రంగులు, సంగీతంలో ఏడు స్వరాలు, మనుషుల్లో ఏడు చక్రాలు, పెళ్లిలో ఏడు అడుగులు, ప్రపంచంలో ఏడు వింతలు.. ఏడో నెల.. ఏడో తారీఖు.. ప్రపంచ క్రికెట్ అద్భుతానికి పుట్టినరోజు శుభాకాంక్షలు" అని రాసుకొచ్చాడు సెహ్వాగ్.
"నీ జీవితంలో అంతా మంచే జరగాలి. అదృష్టం, ప్రేమ, విజయం నీ వెంట ఉండాలి" అంటూ వీవీఎస్ లక్ష్మణ్ ట్వీట్ చేశాడు.
"2004లో బంగ్లాదేశ్తో మొదటిసారి కలిసి ఆడాం. వైజాగ్లో జరిగిన మ్యాచ్లో పాకిస్థాన్పై 148 పరుగులు చేసి ప్రపంచానికి నీవేంటో పరిచయం చేశావు. తర్వాత తిరిగి చూసుకోలేదు. దినదినాభివృద్ధి చెందుతూ సాగావు. నీకు పుట్టినరోజు శుభాకాంక్షలు" అంటూ భారత మాజీ క్రికెటర్ కైఫ్ ట్వీట్ చేశాడు.