ఈ వరల్డ్​కప్​లో రెండోసారి అడ్డుకున్న వరణుడు

సౌతాంప్టన్ వేదికగా వెస్టిండీస్ - దక్షిణాఫ్రికా మధ్య జరగాల్సిన ప్రపంచకప్ 15వ మ్యాచ్ వర్షం కారణంగా రద్దయింది. ఇరు జట్లకు చెరో పాయింట్ లభించింది. టాస్ ఓడి బ్యాటింగ్​కు దిగిన సఫారీ జట్టు 7.3 ఓవర్లలో 2 వికెట్ల నష్టానికి 29 పరుగులు చేసింది.

ఈ ప్రపంచకప్​లో రెండో సారి వరణుడు మ్యాచ్​ జరగకుండా అడ్డుకున్నాడు. సౌతాంప్టన్ వేదికగా వెస్టిండీస్ - దక్షిణాఫ్రికా మధ్య మ్యాచ్ వర్షం కారణంగా రద్దయింది. మ్యాచ్ ఫలితం తేలని కారణంగా ఇరు జట్లకు చెరో పాయింట్ లభించింది.

చాలాసేపు కురిసిన వర్షం మధ్యలో ఆగినా.. ఔట్ ఫీల్డ్ చిత్తడిగా ఉండటం వల్ల మ్యాచ్​ నిర్వహించేందుకు వీలు పడలేదు. పదే పదే జల్లులు పడటం.. పిచ్​ను కవర్లతో కప్పేయడం ఇదే తంతుగా సాగింది. అంపైర్లు మధ్యలో చాలాసార్లు పిచ్​ను పరిశీలించారు. అయినా మైదానం సహకరించనందున మ్యాచ్​ రద్దు చేయాల్సి వచ్చింది.

టాస్ ఓడి బ్యాటింగ్​కు దిగిన దక్షిణాఫ్రికా 7.3 ఓవర్లలో 2 వికెట్ల కోల్పోయి 29 పరుగులు చేసింది. అనంతరం వర్షం వచ్చింది. డుప్లెసిస్(0), డికాక్(17) క్రీజులో ఉన్నారు. విండీస్ బౌలర్ షెల్డన్ కాట్రెల్ రెండు వికెట్లు తీశాడు. మూడు పరాజయాలతో డీలా పడిన సౌతాఫ్రికా.. పాయింట్ల పట్టికలో ఖాతా తెరిచింది.

జూన్ 7న బ్రిస్టల్ వేదికగా శ్రీలంక - పాకిస్థాన్ మ్యాచ్​ కూడా వర్షం కారణంగా రద్దయింది.

ఆ మ్యాచ్​లో టాస్ పడకుండానే ఆట నిలిపివేయాల్సి వచ్చింది.