ప్రపంచకప్లో మంచి ప్రదర్శన చేయాలని ఆశ పడిన అఫ్గాన్ జట్టు హ్యాట్రిక్ ఓటములు చవిచూసింది. ఇప్పటికే రెండు మ్యాచుల్లో పరాభవాన్ని ఎదుర్కొన్న ఈ పసికూన... శనివారం న్యూజిలాండ్తో జరిగిన మ్యాచ్లోనూ ఓటమిపాలైంది. ముందుగా న్యూజిలాండ్ పేస్ బౌలర్ల ధాటికి అఫ్గాన్ 172 పరుగులకే కుప్పకూలింది. స్పల్ప లక్ష్యాన్ని న్యూజిలాండ్ అలవోకగా ఛేదించింది.
అలవోకగా ఛేదన...
173 పరుగుల స్వల్ప లక్ష్యంతో బరిలోకి దిగిన కివీస్ జట్టు... 32.1 ఓవర్లలో 3 వికెట్లు కోల్పోయి విజయం సాధించింది. న్యూజిలాండ్ బ్యాట్స్మెన్లలో కేన్ విలియమ్సన్ 79 పరుగుల (99 బంతుల్లో; 9 ఫోర్లు)తో నాటౌట్గా నిలిచాడు. రాస్ టేలర్ 48 పరుగులు (52 బంతుల్లో; 6 ఫోర్లు, 1 సిక్స్) చేసి మరోసారి మంచి ఇన్నింగ్స్ ఆడాడు.
అఫ్గాన్ బౌలర్లు పెద్దగా సత్తా చాటలేకపోయారు. అప్తాబ్ అలమ్ 3 వికెట్లు తీశాడు.
తేలిపోయిన పసికూనలు..
తొలుత బ్యాటింగ్ చేసిన అఫ్గాన్ జట్టు బ్యాట్స్మెన్లు కివీస్ పేస్ దళానికి తలవంచారు. అఫ్గాన్ను తక్కువ పరుగులకే కట్టడిచేయడంలో న్యూజిలాండ్ బౌలర్లు విజయవంతమయ్యారు. బ్యాట్స్మెన్లను పదునైన బంతులతో నీషమ్, ఫెర్గుసన్ బెంబేలెత్తించారు. ఫలితంగా 41.1 ఓవర్లలో 172 పరుగులకే సర్దేసింది అఫ్గాన్ జట్టు. హష్మతుల్లా (59) ఒక్కడే అర్ధశతకంతో ఆకట్టుకున్నాడు. నూర్ అలీ (34), హజ్రతుల్లా (31) రాణించారు.
కివీస్ బౌలర్లలో నీషమ్ 5 వికెట్లు, ఫెర్గుసన్ 4 వికెట్లు, గ్రాండ్హోమ్ ఒక్క వికెట్ తీశారు.
నీషమ్ విజృంభణ:
ఓపెనర్ హజ్రతుల్లా వికెట్తో పాటు రెహ్మత్ షా, గుల్బాదిన్ నబీ, మొహమ్మద్ నబీ, నజీబుల్లా వికెట్లు తీసి అఫ్గాన్ టాప్ ఆర్డర్ను కుప్పకూల్చాడు నీషమ్. ఈ కివీస్ బౌలర్ 10 ఓవర్లలో 31 పరుగులు ఇచ్చి 5 వికెట్లు తీశాడు. నీషమ్ బంతులకు అఫ్గాన్ బ్యాట్స్మెన్ దగ్గర సమాధానం కరవైంది. ఈ ప్రపంచకప్లో 5 వికెట్లు తీసిన రెండో బౌలర్గా ఘనత'సాధించాడు నీషమ్. జట్టు విజయంలో కీలక పాత్ర పోషించిన నీషమ్కే 'మ్యాన్ ఆఫ్ ద మ్యాచ్' అవార్డు దక్కింది.
