భారత్​Xపాక్​ : టికెట్​ ధర కేవలం రూ. 4 లక్షలే

మాంచెస్టర్​ వేదికగా చిరకాల ప్రత్యర్థులు భారత్​-పాక్​ నేడు అమీతుమీ తేల్చుకోనున్నాయి. ఈ మ్యాచ్​ చూసేందుకు అభిమానులు దాదాపు ఒక్కో టికెట్​కు రూ.4 లక్షలకు పైనే చెల్లించారని సమాచారం. అయితే అది స్టేడియంలోని అన్నింటికీ కాదు. మ్యాచ్​కు వారం రోజుల ముందు మలి విక్రయాల్లో ఉంచిన 480 టికెట్లకు మాత్రమే భారీ మొత్తంలో చెల్లించాల్సి వచ్చింది.

భారత్​-పాకిస్థాన్​​ మధ్య మ్యాచ్​ అంటే క్రికెట్​ అభిమానులకు పండుగే కాదు... ఐసీసీకి అత్యంత ఆదాయాన్ని తెచ్చిపెట్టే మ్యాచ్​ కూడా. టోర్నీ ఏదైనా, వేదిక ఎక్కడైనా ఈ హోరాహోరీ పోరుకు అభిమానుల తాకిడి ఎప్పుడూ తగ్గదు. ఇరుదేశాల మధ్య క్రికెట్ మ్యాచ్​ అత్యంత భావోద్వేగాలతో కూడుకున్నది కావడమే ఇందుకు కారణం. అయితే ఇదే అంశం ఇప్పుడు టికెట్​ అమ్మకందారులను అత్యాశలో ముంచెత్తుతోంది. సాధారణ టికెట్​ ధరలకంటే ఊహించని విధంగా రేట్లను పెంచేసి అభిమానుల నుంచి భారీగా దండుకుంటున్నాయి టికెట్లను విక్రయించే కొన్ని సంస్థలు. తాజాగా మాంచెస్టర్​లో జరగనున్న మ్యాచ్​ నేపథ్యంలో ఇలాంటి దృశ్యమే ఎదురైంది. ఒక్కో టికెట్​ను ఏకంగా రూ.4 లక్షలకు పైగానే విక్రయించింది వయాగోగో సంస్థ.

భారత్​-పాక్​ ప్రపంచకప్​ మ్యాచ్ టికెట్లన్నీ అమ్ముడైపోయాయని ఐసీసీ కొద్ది నెలల క్రితమే ప్రకటించింది. వీటిలో రెండొంతుల మూడుభాగాల టికెట్లు భారత అభిమానులే కొనుగోలు చేశారని.. పాక్​ అభిమానులు కేవలం 18 శాతం టికెట్లు మాత్రం కొన్నారని తెలిపింది.

అయితే తమ టికెట్లను రద్దు చేసి రీసేల్(మలి అమ్మకాలు) జరపాలని 480 మంది అభిమానులు ఐసీసీకి అభ్యర్థించారు. ఫలితంగా ఈ టికెట్లను అమ్మకాల్లో ఉంచాలని నిర్ణయించింది ఐసీసీ. ఇదే అదునుగా వయాగోగో వెబ్​సైట్ నిబంధనలు పట్టించుకోకుండా టికెట్​ రేట్లను తమకు ఇష్టమొచ్చినట్లు పెంచేసింది.​ మ్యాచ్​కు వారం రోజుల ముందు అమ్మకాలు జరిపిన ఈ సంస్థ... గోల్డ్​ లెవల్​లో ఒక్కో టికెట్​ ధర ఏకంగా రూ. 4 లక్షలకు పైనే విక్రయించింది.

కొన్ని నెలల ముందు సాధారణంగా జరిపిన అమ్మకాల్లో అత్యంత ఖరీదైన అడల్ట్​ ప్లాటినమ్​ టికెట్​ విలువ 300 డాలర్లు (దాదాపు రూ. 20,964). ఐతే మ్యాచ్​కు వారం ముందు వయాగోగో వెబ్​సైట్​ ద్వారా చేపట్టిన అమ్మకాల్లో ప్లాటినమ్​ కంటే తక్కువైన గోల్డ్ లెవల్​ టికెట్​ ధరే ఏకంగా 6 వేల డాలర్లు(దాదాపు రూ. 4,20,000) పలికింది.