బీసీసీఐకి యువరాజ్ లేఖ.. ఎందుకోసం..?

విదేశీ క్రికెట్​ లీగ్​ల్లో ఆడేందుకు అనుమతివ్వాలంటూ భారత మాజీ క్రికెటర్ యువరాజ్ సింగ్ బీసీసీఐకి లేఖ రాశాడు. ఇటీవలే అంతర్జాతీయ క్రికెట్​ నుంచి రిటైర్మెంట్ తీసుకున్నాడీ లెఫ్ట్ హ్యాండ్ బ్యాట్స్​మెన్.

ఇటీవలే రిటైర్మెంట్​ తీసుకున్న భారత క్రికెటర్ యువరాజ్ సింగ్.. విదేశీ టోర్నీల్లో ఆడేందుకు అనుమతివ్వాలంటూ భారత క్రికెట్​ నియంత్రణ మండలి(బీసీసీఐ)కి లేఖ రాశాడు. వినోదాన్ని ఆస్వాదించేందుకే ఈ లీగ్​ల్లో ఆడుతున్నానని అభిప్రాయం వ్యక్తం చేశాడు.

"నేను విదేశాల్లో జరిగే టీ20 క్రికెట్​లో పాల్గొనాలనుకుంటున్నా. నా వయసు దృష్ట్యా ఆనందం కోసమే క్రికెట్ ఆడాలనుకుంటున్నా. ఇప్పుడు అంతర్జాతీయ క్రికెట్, ఐపీఎల్ ఆడటమనేది ఒత్తిడితో కూడుకున్నది" -యువరాజ్ సింగ్, క్రికెటర్

విదేశీ లీగ్​ల్లో ఆడేందుకుగత వారమే యువరాజ్.. బీసీసీఐ అనుమతి కోరాడు. కానీ.. అప్పటికి అంతర్జాతీయ క్రికెట్ నుంచి రిటైర్మెంట్ ప్రకటించని కారణంగా ఆ విషయాన్ని తిరస్కరించింది బోర్డు.

"మంగళవారం యువరాజ్​.. బోర్డుకు లేఖ రాశాడు. ఇందులో చిక్కొచ్చే విషయమేమి కనిపించడం లేదు. ఎందుకంటే అంతర్జాతీయ క్రికెట్​, ఐపీఎల్ నుంచి యువరాజ్ రిటైర్మెంట్ ప్రకటించాడు."-బీసీసీఐ అధికారి

ప్రస్తుతం అన్ని ఫార్మాట్​ల నుంచి రిటైర్మెంట్ తీసుకున్న వీరేంద్ర సెహ్వాగ్, జహీర్ ఖాన్.. యూఏఈలో జరిగే టీ10 లీగ్​ల్లో ఆడుతున్నారు.

కరీబియన్ లీగ్​లో పాల్గొనేందుకు తన పేరిచ్చిన ఇర్ఫాన్ పఠాన్.. విదేశీ లీగ్​లో ఆడనున్న తొలి ఆటగాడిగా నిలిచాడు. కానీ బీసీసీఐ అనుమతి అతడింకా తీసుకోలేదు.

ఇది చదవండి: సిక్సర్ల 'యువరాజు' భావోద్వేగ వీడ్కోలు