'పంత్​.. నువ్వు ఎవ్వరి మాటా వినొద్దు'

టీమిండియా యువ వికెట్​కీపర్​ రిషబ్​ పంత్​కు మద్దతుగా నిలిచాడు సీనియర్​ క్రికెటర్​ పార్థివ్​ పటేల్​. విమర్శలను పట్టించుకోకుండా ఆటపై ఎక్కువ దృష్టిపెట్టాలని సూచించాడు. ఒత్తిడిలో ధైర్యంగా ఉన్నప్పుడే నిజమైన నైపుణ్యం బయటపడుతుందని అన్నాడు పార్థివ్​.

భారత సీనియర్​ వికెట్​కీపర్​ పార్థివ్​ పటేల్​... యువ క్రికెటర్ రిషబ్​ పంత్​కు విలువైన సూచనలిచ్చాడు. విమర్శలను పట్టించుకోవద్దని సలహా ఇస్తూనే... ఆటపై ఎక్కువగా దృష్టిపెట్టాలని అన్నాడు. ఫామ్‌ ఉన్నప్పుడు పరిస్థితులు బాగానే ఉంటాయని... పరుగులు చేయలేనప్పుడే అన్ని వైపుల నుంచి ఒత్తిడి వస్తుందని పేర్కొన్నాడు. అలాంటప్పుడు ధైర్యంగా నిలబడితే, టాప్​ క్రికెటర్​గా రాణించవచ్చని పార్థివ్​ చెప్పాడు.

"ఈరోజుల్లో సీనియర్లతో కలిసి ఆడటం, డ్రెస్సింగ్‌ రూమ్​ను పంచుకోవడం యువ క్రికెటర్లకు మంచి అవకాశం. అయితే ఫామ్ కోల్పోయి ఇబ్బంది పడినప్పుడు వీళ్లకు అన్ని వైపుల నుంచి విమర్శలు ఎదురవుతాయి. అందరి అభిప్రాయాల్ని పట్టించుకోవడం మానేసి ముఖ్యంగా ఆటపై దృష్టి పెట్టాలి. భారత్‌ తరఫున ఆడటం చాలా ఒత్తిడితో కూడిన విషయం. ప్రతి ఆటగాడు వివిధ సందర్భాల్లో ఒత్తిడిని ఎదుర్కొంటాడు. కష్ట సమయాల్లో రాణిస్తేనే మంచి క్రీడాకారుడి​గా ఎదుగుతారు. పంత్​.. నువ్వు ప్రతిభ ఉన్న క్రికెటర్​వి. యాజమాన్యం, సెలక్టర్లు నీపై నమ్మకం ఉంచినప్పుడు నువ్వు దాన్ని నిలబెట్టుకోవాలి. ప్రతి క్షణాన్ని ఆస్వాదించు"

--పార్థివ్​ పటేల్​, సీనియర్​ క్రికెటర్​

టెస్టు ఫార్మాట్​లో అత్యుత్తమ వికెట్ కీపర్ ఎవరనే విషయంపై సమాధానమిచ్చాడు పార్థివ్​. బంగాల్​కు చెందిన వృద్ధిమాన్ సాహా నెం.1 అని చెప్పాడు.

2019 ప్రపంచకప్​ తర్వాత ధోనీ విరామంతో జట్టులో చోటు దక్కించుకున్నాడు రిషబ్​ పంత్​. అయితే పలు సిరీస్​ల్లో పరుగులు చేయలేక, కీపింగ్​లోనూ విఫలమై విమర్శలు ఎదుర్కొన్నాడు పంత్​. గతేడాది చివరిగా జరిగిన బంగ్లాదేశ్​, విండీస్​ సిరీస్​ల్లో కాస్త ఫర్వాలేదనిపించాడు. ఈనెల 5 నుంచి లంకతో ప్రారంభమయ్యే టీ20 సిరీస్​కు పంత్​, సంజు శాంసన్​ను కీపర్లుగా ఎంపిక చేశారు సెలక్టర్లు.