ప్రపంచకప్ తర్వాత టీమిండియాకు కొత్త కోచ్, సహాయ సిబ్బందిని ఇటీవలే బీసీసీఐ నియమించింది. తాజాగా వీరి జీతాలనూ పెంచిందని సమాచారం. ప్రధాన కోచ్ రవిశాస్త్రి వార్షిక జీతం రూ.10 కోట్లకు చేరే అవకాశం ఉంది.
ఇటీవల రెండోసారి కోచ్గా ఎంపికైన రవిశాస్త్రి.. 2021లో జరిగే టీ20 ప్రపంచకప్ వరకు సేవల్ని అందించనున్నాడు. ప్రస్తుతం అతడికి ఏడాదికి రూ. 8 కోట్ల వరకు జీతాన్ని బీసీసీఐ చెల్లిస్తోంది. తాజాగా 20 శాతం పెంచింది. అంటే దాదాపు రూ. 1.5 కోట్ల వరకు పెరగనుంది. ఫలితంగా ఏడాదికి రూ. 9.5- 10 కోట్ల మధ్య వేతనం వచ్చే అవకాశం ఉంది.
సంజయ్‌ బంగర్‌ స్థానంలో ఎంపికైన నూతన బ్యాటింగ్ కోచ్ విక్రమ్‌ రాఠోడ్‌ వార్షిక వేతనంగా రూ. 2.5 కోట్ల నుంచి రూ. 3 కోట్లు అందుకోనున్నాడు. ఫీల్డింగ్‌ కోచ్ శ్రీధర్‌, బౌలింగ్‌ కోచ్ భరత్‌ అరుణ్‌ వార్షిక వేతనాలూ పెరిగాయి. వారు ప్రస్తుతం ఏడాదికి రూ. 3.5 కోట్ల వరకు తీసుకోనున్నారని సమాచారం. పెంచిన జీతాలు సెప్టెంబర్‌ 1 నుంచి అమల్లోకి రానున్నాయి.
ఇటీవల జరిగిన వెస్టిండీస్ పర్యటనలో అన్ని ఫార్మాట్లలోనూ విజేతగా నిలిచిన టీమిండియా స్వదేశంలో దక్షిణాఫ్రికాతో జరిగే సిరీస్ కోసం సమాయత్తమవుతోంది. సఫారీ జట్టుతో మూడు టీ20లు, మూడు టెస్టులు ఆడనుంది కోహ్లీ సేన.
ఇదీ చదవండి: పాకిస్థాన్లో ఆడేందుకు శ్రీలంక క్రికెటర్ల విముఖత
