అంతర్జాతీయ క్రికెట్కు రిటైర్మెంట్ ప్రకటించిన యువరాజ్ సింగ్ సేవలను ప్రశంసిస్తూ పలువురు క్రీడాకారులు ట్విట్టర్లో స్పందించారు.
"యువీ... నీది ఎంతో అద్భుతమైన క్రీడా జీవితం. జట్టుకు అవసరమైన ప్రతిసారి నిజమైన ఛాంపియన్లా ఆదుకున్నావు. మైదానంలోనూ, వ్యక్తిగత జీవితంలోనూ ఒడుదొడుకులు ఎదుర్కొని చక్కని పోరాట పటిమ ప్రదర్శించావు. నూతన జీవితం బాగుండాలని కోరుకుంటున్నా. క్రికెట్లో నీ సేవలకు ధన్యవాదాలు."
-సచిన్ తెందూల్కర్.
"ఎంతోమంది ఆటగాళ్లు వస్తుంటారు వెళ్తుంటారు. యువరాజ్ లాంటి ఆటగాళ్లు చాలా అరుదుగా ఉంటారు. ఎన్నో కష్టాలను అధిగమించాడు. ఆరోగ్య సమస్యను, బౌలర్లను దీటుగా ఎదుర్కొని ఎంతోమంది హృదయాలను గెలుచుకున్నాడు. తన పోరాటం, సంకల్పంతో ఎంతోమందికి ఆదర్శంగా నిలిచాడు. జీవితం బాగుండాలని కోరుకుంటున్నా."
-వీరేంద్ర సెహ్వాగ్, భారత మాజీ క్రికెటర్.
" భారత జట్టుకు ప్రాతినిధ్యం వహించి అద్భుత ఆటతీరు ప్రదర్శించినందుకు అభినందనలు పాజీ. ఎన్నో జ్ఞాపకాలు మరెన్నో విజయాలను అందించావు. భవిష్యత్తులో సంతోషంగా ముందుకు సాగాలని కోరుకుంటున్నా. నిజమైన ఛాంపియన్."
-విరాట్ కొహ్లీ.
"సంతోషకరమైన వీడ్కోలు. ఎత్తులు, పల్లాలు చూసిన గొప్ప క్రీడా జీవితం. నీలి దుస్తుల్లో సవాళ్లను ఎదుర్కొని సత్తా చాటి స్వచ్ఛమైన నైపుణ్య ఆటతీరుతో ఆకట్టుకున్నావు. ప్రేమతో.."
-కెవిన్ పీటర్సన్, ఇంగ్లండ్ మాజీ క్రికెటర్.
"అద్భుతమైన క్రీడా జీవితానికి యువీకి అభినందనలు. నిర్ణీత ఓవర్ల క్రికెట్లో భారత అత్యుత్తమ ఆటగాడివి నువ్వే. యువీ గౌరవార్థం 12వ నంబర్ జెర్సీకి బీసీసీఐ వీడ్కోలు ప్రకటించాలి."
-గౌతం గంభీర్.