వెల్లింగ్టన్ వేదికగా భారత్-న్యూజిలాండ్ జట్ల మధ్య మొదటి టెస్టు జరుగుతోంది. ఇందులోని తొలి ఇన్నింగ్స్లో రిషభ్‌పంత్‌ రనౌట్ కావడం వల్లే, వారిని త్వరగా ఆలౌట్‌ చేయగలిగామని న్యూజిలాండ్ పేసర్ టిమ్ సౌథీ అన్నాడు. అజింక్య రహానెతో రిషబ్ ఆడుంటే భారీ స్కోరు చేసేవాడని అభిప్రాయపడ్డాడు. పంత్ ఔటైన కాసేపటికే సౌథీ బౌలింగ్‌లోనే రహానె వెనుదిరిగాడు. ఈ విషయం గురించి మాట్లాడాడు బౌలర్ సౌథీ.
"రహానెను ఔట్ చేసేందుకు మేం ఎలాంటి వ్యూహం అనుసరించలేదు. ఉదయం పంత్ రనౌట్ కావడమే మ్యాచ్లో కీలక మలుపు. లేదంటే తన బ్యాటింగ్తో వేగంగా పరుగులు చేసేవాడు. రిషభ్ పెవిలియన్‌ చేరితే అజింక్య దూకుడుగా ఆడతాడని తెలుసు. అందుకే మేం కట్టుదిట్టంగా బంతులు విసిరాం. టీమిండియాను తక్కువ పరుగులకే ఆలౌట్‌ చేశాం. ఒకప్పటిలా నేను బంతిని వేగంగా విసరడం లేదు. వేగం గురించి ఆందోళన పడట్లేదు. నా మిగతా నైపుణ్యాలను ఉపయోగించుకుంటున్నా. నిన్నటిలా నేడు(శనివారం) గాలులు వేగంగా వీయకపోయినా వాతావరణం అనుకూలిస్తుండటం వల్ల బంతిని రెండు వైపులా స్వింగ్‌ చేశాను. ప్రస్తుత మ్యాచ్లో మేం చక్కని స్థితిలో ఉన్నాం. ఇదే జోరుతో విలువైన భాగస్వామ్యం నిర్మిస్తే రెండో ఇన్నింగ్స్ సులువు అవుతుంది. సాధారణంగా బేసిన్‌ రిజర్వ్‌లో రెండో రోజు బంతి తిరగడం ఇంతకుముందు చూడలేదు. అందుకే తొలి ఇన్నింగ్స్లో పరుగులు చేయడం అత్యంత కీలకం. ముందుగానే భారీ స్కోరు చేస్తే తర్వాత సులభం అవుతుంది. మిగతా మూడు రోజుల్లో పిచ్‌ ఎలా ఉంటుందో తెలియదు"