పాకిస్థాన్ యువ క్రికెటర్ అబిద్ అలీ.. ప్రపంచ క్రికెట్లో అరుదైన ఘనత సాధించాడు. అరంగేట్రంలోనే టెస్టు, వన్డే ఫార్మాట్లలో సెంచరీలు చేసిన తొలి పురుష క్రికెటర్గా రికార్డులకెక్కాడు. శ్రీలంకతో రావల్పిండి వేదికగా జరుగుతున్న తొలి టెస్టులో శతకం బాదడం ద్వారా ఇది సాధ్యమైంది.
ఈ ఏడాది మార్చిలో దుబాయ్ వేదికగా ఆస్ట్రేలియాతో తొలి అంతర్జాతీయ వన్డే మ్యాచ్ ఆడాడు అలీ. ఇందులో 112 పరుగులు చేశాడు. తాజాగా శ్రీలంకతో జరిగిన టెస్టులో 183 బంతుల్లో 100 పరుగులు(11 ఫోర్లు) సాధించాడు. ఈ రెండు సెంచరీలు ఒకే ఏడాది చేయడం విశేషం.
ఈ శతకంతో దాయాది దేశం దిగ్గజాల సరసన చేరాడు అబిద్. అరంగేట్రంలోనే సుదీర్ఘ ఫార్మాట్లో సెంచరీ చేసిన 13వ పాకిస్థాన్ క్రికెటర్గా పేరు తెచ్చుకున్నాడు. గతంలో ఇలాగే సెంచరీలు చేసిన జావేద్ మియాందాద్, మహ్మద్ వసీం, యూనిస్ ఖాన్, అలీ నవ్వీ సరసన నిలిచాడు.