సామాజిక మాధ్యమాల్లో చురుకుగా ఉండే టీమిండియా కెప్టెన్ విరాట్ కోహ్లీ మరోసారి వార్తల్లో నిలిచాడు. తన ట్విట్టర్‌లో పోస్టు చేసిన ఫొటో ఒకటి సోషల్ మీడియాలో వైరల్ అయింది. ఆ చిత్రంలో కోహ్లీ చొక్కా లేకుండా కేవలం షార్ట్పై కూర్చుని ఉన్నాడు. "మనం అంతర్గత మనసు గురించి తెలుసుకున్నన్నాళ్లు బయట దేనినీ వెతకాల్సిన అవసరం లేదు" అంటూ రాసుకొచ్చాడు.
ఈ ఫొటోపై సోషల్ మీడియాలో నెటిజన్లు ఛలోక్తులు విసురుతున్నారు. "ప్రపంచంలోనే అత్యుత్తమ క్రికెటర్.. ట్రాఫిక్ చలానా చెల్లించాక ఇలా అయ్యాడు" అంటూ ఓ నెటిజన్ జోక్ వేయగా.. "కోహ్లీ.. ట్రాఫిక్ పోలీసులు ఎంత చలానా వేశారేంటి?" అని ఇంకో అభిమాని.. "విరాట్ కోహ్లీ ఇప్పుడు ఎంత చలానా చెల్లించాడో" అని మరొకరు ట్వీట్ చేశారు. మూడు రోజుల క్రితం దిల్లీలో ట్రాఫిక్ పోలీసులు హెల్మెట్‌ పెట్టుకోలేదని ఓ వ్యక్తికి రూ.23,000 చలానా వేశారు. దీనిని దృష్టిలో పెట్టుకుని నెటిజన్లు ఫన్నీగా కామెంట్లు పెడుతున్నారు.