ఇటీవల టీమ్‌ఇండియాతో ఆడిన చివరి రెండు టెస్టుల్లో పూర్తిగా విఫలమైన ఇంగ్లాండ్ బ్యాట్స్మన్ జానీ బెయిర్స్టో(124) గతరాత్రి జరిగిన రెండో వన్డేలో శతకంతో కదంతొక్కాడు. తప్పక గెలవాల్సిన మ్యాచ్‌లో ఇంగ్లాండ్‌ను విజయపథంలో నడిపించాడు. మ్యాచ్‌ అనంతరం మాట్లాడిన అతడు.. టెస్టు క్రికెట్‌ సందర్భంగా టీమ్ఇండియా దిగ్గజం సునీల్‌ గావస్కర్ చేసిన వ్యాఖ్యలపై స్పందించాడు. తన ఫోన్ ఆన్లోనే ఉందని, టీమ్ఇండియా బ్యాటింగ్‌ దిగ్గజం కావాలంటే ఫోన్ చెయ్యొచ్చని చెప్పాడు.
అహ్మదాబాద్‌ వేదికగా మొతేరా స్టేడియంలో జరిగిన చివరి రెండు టెస్టుల్లో బెయిర్స్టో మూడుసార్లు డకౌటైన సంగతి తెలిసిందే. ఈ నేపథ్యంలోనే గావస్కర్ అప్పుడు అతడి బ్యాటింగ్‌పై విమర్శలు చేశాడు. ఇంగ్లిష్‌ ఓపెనర్‌ క్రీజులో ఉండడానికి ఆసక్తి చూపట్లేదని అన్నాడు. ఈ క్రమంలోనే తాజాగా శతకం బాదిన బెయిర్స్టో ఆ వ్యాఖ్యలపై స్పందించాడు. ‘నిజం చెప్పాలంటే గావస్కర్ ఏమన్నాడో నాకు తెలియదు. రెండోది మా మాధ్య ఎలాంటి సంభాషణలు జరగనప్పుడు ఆ విషయంపై ఒక అభిప్రాయం ఎలా ఏర్పడుతుందనే దానిపై నాకు ఆసక్తి ఉంది’ అని పేర్కొన్నాడు.