తర్వాతి రెండు టెస్టులకు అండర్సన్​ అనుమానమే!

యాషెస్ సిరీస్​ తొలి టెస్టు మధ్యలోనే మైదానం వీడిన ఇంగ్లీష్ బౌలర్ అండర్సన్ తర్వాతి రెండు మ్యాచ్​లకు దూరమయ్యే అవకాశం కనిపిస్తోంది. తొడ కండరాల గాయం తిరగబెట్టడం వల్ల ఇంకా పూర్తిగా కోలుకోలేదు.

యాషెస్​ సిరీస్​ ఆరంభంలోనే ఆతిథ్య ఇంగ్లాండ్​కు పెద్ద ఎదురుదెబ్బ తగిలింది. ఆ జట్టు కీలక బౌలర్​, సీనియర్​ ఆటగాడు జేమ్స్​ అండర్సన్ తర్వాతి రెండు టెస్టు మ్యాచ్​లకు దూరమయ్యే అవకాశముంది. తొలి మ్యాచ్​లో కేవలం 4 ఓవర్లే వేసి మైదానం వీడాడీ పేసర్​. తొడ కండరాల గాయం కారణంగా మళ్లీ బౌలింగ్​కు దిగలేదు.

గత వారం ఐర్లాండ్​తో టెస్టులోనూ ఈ కారణంతోనే ఆడలేదు. యాషెస్ సిరీస్​ ప్రారంభమయ్యే సమయానికి కోలుకున్నా.. మళ్లీ కండరాలు పట్టేయడం వల్ల మ్యాచ్​ మధ్యలోనే మైదానాన్ని వీడాడు. ప్రస్తుతం ఇంకా గాయం నుంచి కోలుకోని అండర్సన్ తర్వాతి రెండు టెస్టుల్లోనూ ఆడేది అనుమానంగా కనిపిస్తోంది.

తొలి ఇన్నింగ్స్​లో 122కే 8 వికెట్లు కోల్పోయి పీకల్లోతు కష్టాల్లో పడింది ఆసీస్​. ఆ సమయంలో స్మిత్(144) విజృంభించడం వల్ల 284 పరుగులు చేసింది. అండర్సన్​ లాంటి సీనియర్ బౌలర్ ఉండుంటే కంగారూ జట్టును తక్కువ స్కోరుకే పరిమితం చేసేది ఆతిథ్య జట్టు​.

స్మిత్ మినహా బ్యాటింగ్​లో పెద్దగా రాణించని ఆసీస్...​ బౌలింగ్​లోను ఆకట్టుకోలేకపోయింది. ఇప్పటికే 267 పరుగులు చేసిన ఇంగ్లీష్ జట్టు ఆసీస్​ స్కోరును అధిగమించేందుకు 17 పరుగుల దూరంలో ఉంది. చేతిలో ఇంకా ఆరు వికెట్లు ఉన్నాయి.

ఇవీ చూడండి.. భారత్​Xవిండీస్​ 'టీ20': ఇవి తెలుసుకోండి