మెరిసిన మ్యాక్సీ.. ఆర్సీబీ, పంజాబ్​ కౌంటర్లు

ముంబయి ఇండియన్స్​తో జరిగిన మ్యాచ్​లో విజయం సాధించింది రాయల్ ఛాలెంజర్స్ బెంగళూరు. ఈ మ్యాచ్​లో మ్యాక్స్​వెల్​ సత్తాచాటడం వల్ల పంజాబ్​ కింగ్స్​కు కృతజ్ఞతలు తెలిపింది ఆర్సీబీ. ఆ తర్వాత ఈ రెండు జట్లు ట్విట్టర్​లో కౌంటర్లను కొనసాగించాయి.

ముంబయి ఇండియన్స్​తో జరిగిన తొలి మ్యాచ్​లో విజయం సాధించింది రాయల్ ఛాలెంజర్స్ బెంగళూరు. ఈ మ్యాచ్​లో తన బ్యాటింగ్​తో మెప్పించాడు ఆర్సీబీ బ్యాట్స్​మన్ గ్లెన్ మ్యాక్స్​వెల్. 28 బంతుల్లో 39 పరుగులు చేసి ఆకట్టుకున్నాడు. అయితే గతేడాది పంజాబ్​కు ఆడిన ఇతడు 13 మ్యాచ్​ల్లో కేవలం 108 పరుగులు మాత్రమే చేశాడు. దీంతో ఇతడిని ఈ సీజన్​కు ముందు వదులుకుంది పంజాబ్. ఆ తర్వాత వేలంలో మ్యాక్సీని భారీ ధరకు కొనుగోలు చేసింది బెంగళూరు. తాజాగా అతడు మొదటి మ్యాచ్​లోనే సత్తాచాటడం వల్ల అతడి మాజీ జట్టుకు ఓ సందేశం పంపింది ఆర్సీబీ.

"ఆర్సీబీ తరఫున మొదటి సిక్సు. ఆ బంతి చెన్నై అవతల పడింది. థ్యాంక్యూ పంజాబ్ కింగ్స్. ఒకవేళ భౌతిక దూరం లేకుంటే మిమ్మల్ని కౌగిలించుకునే వాళ్లం" అంటూ పోస్ట్ చేసింది బెంగళూరు.

దీనికి కౌంటర్ ఇచ్చింది పంజాబ్. "హా థ్యాంక్యూ గేల్, రాహుల్, మన్​దీప్, సర్ఫరాజ్, మయాంక్ అగర్వాల్​లను ఇచ్చినందుకు" అంటూ ట్వీట్ చేసింది.

ప్రారంభంలో ఆర్సీబీకి ఆడిన గేల్, రాహుల్, మన్​దీప్, సర్ఫరాజ్, మయాంక్ ప్రస్తుతం పంజాబ్ జట్టులో కొనసాగుతున్నారు. ఈ నేపథ్యంలోనే ఈ ట్వీట్ చేసింది ఫ్రాంచైజీ.

ఆ తర్వాత మరో ఫన్నీ కౌంటర్​తో పంజాబ్​కు సమాధానమిచ్చింది ఆర్సీబీ. "మీరు జెర్సీ, ప్యాడ్స్, లోగో మిస్ అయ్యారు" అంటూ పోస్ట్ చేసింది. ఈ సీజన్​ కోసం ఇటీవల కొత్త జెర్సీని రూపొందించింది పంజాబ్ యాజమాన్యం. ఈ జెర్సీ ప్రారంభంలో ఆర్సీబీ ధరించిన జెర్సీని పోలి ఉంది. దీంతో ఈ ట్వీట్ వేసింది రాయల్ ఛాలెంజర్స్.