ఐపీఎల్ ప్రారంభానికి ఇంకా ఐదురోజులు మాత్రమే ఉంది. ఈ క్రమంలోనే మాజీ క్రికెటర్లు, ఇతర క్రికెట్ నిపుణులు ఈ సీజన్లో సత్తాచాటబోయే ఆటగాళ్ల గురించి అనేక విశ్లేషణలు చేస్తున్నారు. కొంత మంది మాజీలు లీగ్లో తమ బెస్ట్ ఎలెవెన్ను ప్రకటించారు. ఇప్పుడు ఆస్ట్రేలియా మాజీ స్పిన్నర్ బ్రాడ్ హాగ్ కూడా తన ఐపీఎల్ టీమ్ను రూపొందించాడు. ఆశ్చర్యకరంగా ఇందులో టీమ్ఇండియా మాజీ కెప్టెన్ ధోనీని ఎంపిక చేయలేదు.
ధోనీ లేకుండా బ్రాడ్ హాగ్ ఐపీఎల్ జట్టు
ఆస్ట్రేలియా మాజీ స్పిన్నర్ బ్రాడ్ హాగ్ ఈ ఏడాది ఐపీఎల్లో అత్యుత్తమ ఆటగాళ్లతో ఓ జట్టును ప్రకటించాడు. అయితే, ఇందులో ధోనీకి చోటు కల్పించకపోవడం గమనార్హం.
బ్రాడ్ హాగ్
ప్రపంచ వ్యాప్తంగా ఉన్న క్రికెట్ అభిమానులు.. ఈ లీగ్లో ధోనీ ఆటను చూసేందుకు ఉత్సాహంగా ఎదురు చూస్తున్నారు. ఇర్ఫాన్ పఠాన్, ఆకాశ్ చోప్రా వంటి కొంతమంది మాజీ క్రికెటర్లు కూడా యూఏఈ వేదికగా జరిగే టోర్నీలో మాహీ అదరగొడతాడని ఆశిస్తున్నట్లు పేర్కొన్నారు. అయితే, బ్రాడ్ హాగ్ ఇందుకు భిన్నంగా ఆలోచించాడు. అంతేకాదు, తన ఉత్తమ ఐపీఎల్ జట్టులో డివిలియర్స్, క్రిస్ గేల్ను కూడా ఎంపిక చేయలేదు.
ఈ ఎలెవెన్ టీమ్కు కెప్టెన్గా కేన్ విలియమ్సన్ను ప్రకటించాడు హాగ్. వీరితో పాటు, ముంబయి ఇండియన్స్ కెప్టెన్ రోహిత్ శర్మ, సన్రైజర్స్ హైదరాబాద్ సారథి డేవిడ్ వార్నర్లను ఓపెనర్లుగా నియమించాడు. కోహ్లీకి మూడో స్థానం కల్పించగా.. కేన్ విలియమ్సన్ను నాలుగో ఆటగాడిగా పేర్కొన్నాడు. పంత్ ఐదో ఆటగాడిగా, వికెట్ కీపర్గానూ జట్టులో స్థానం దక్కించుకున్నాడు. ఇక ఆల్ రౌండర్లుగా ఆండ్రూ రసెల్, సునీల్ నరైన్, రవీంద్ర జడేజాలను ఎంపిక చేశాడు. బౌలర్లుగా భువనేశ్వర్ కుమార్, యుజ్వేంద్ర చాహల్, జస్ప్రీత్ బుమ్రాలను ఎంచుకున్నాడు.