ఎవరి కర్మకు.. వారే బాధ్యులు: ఐసీసీ

యాషెస్ సిరీస్​లో స్టీవ్ స్మిత్​కు వ్యతిరేకంగా కామెంట్లు చేస్తున్న ఇంగ్లాండ్ అభిమానులను ఉద్దేశిస్తూ ఐసీసీ ఓ ట్వీట్ చేసింది. కర్మకు అసలైన అర్థం ఇదేనంటూ ఓ ఫొటో పోస్ట్ చేసింది.

"ఎవరి కర్మకు వారే బాధ్యులు".. భారత సంప్రదాయంలో ఎక్కువ మంది ఈ సిద్ధాంతాన్ని విశ్వసిస్తుంటారు. ఇప్పుడు ఈ 'కర్మ' అనే పదాన్ని విపులీకరించి ట్విట్టర్లో షేర్ చేసింది అంతర్జాతీయ క్రికెట్ మండలి(ఐసీసీ). స్టీవ్ స్మిత్​కు వ్యతిరేకంగా ట్రోల్స్ చేస్తున్న ఇంగ్లాండ్ అభిమానులను ఉద్దేశిస్తూ పోస్ట్ పెట్టింది.

ఎడ్జ్​బాస్టన్​ వేదికగా జరిగిన యాషెస్​ తొలి టెస్టులో స్టీవ్ స్మిత్ బ్యాటింగ్​కు వస్తున్నపుడు ఓ వ్యక్తి స్మిత్ ఏడుస్తున్న ​ఫొటోను మాస్క్​లా ధరించి నిరసన వ్యక్తం చేశాడు. ఈ చిత్రాన్ని ఐసీసీ షేర్ చేసింది.

"కర్మ అంటే.. హిందూ, బౌద్ధ మత సంప్రదాయాల ప్రకారం మనిషి చేసిన పనులు అతడి కర్మానుసారం పర్యావసనాలు ఎదుర్కోవాల్సి ఉంటుంది. తర్వాతి జన్మకైనా.. అనుభవించే వరకు వదలదు" -ఐసీసీ ట్వీట్

ఎంతమంది ఎన్నిరకాలుగా ట్రోల్స్ చేస్తున్నప్పటికీ స్టీవ్ స్మిత్ ఏకాగ్రత మాత్రం దెబ్బతినలేదు. యాషెస్​లో ఆడిన మూడు టెస్టుల్లోనూ అదరగొట్టి ఆసీస్​ను ఆదుకున్నాడు. 134.20 సగటుతో 671 పరుగులు చేశాడు. ఇందులో మూడు శతకాలు(144, 142, 211) రెండు అర్ధసెంచరీలు ఉన్నాయి.

బాల్ ట్యాంపరింగ్​ వివాదంతో ఏడాది నిషేధం ఎదుర్కొన్న స్మిత్​ను లక్ష్యంగా చేసుకుని ప్రపంచకప్​, యాషెస్​ సిరీస్​లో అతడిని కామెంట్ చేశారు ఇంగ్లాండ్ అభిమానులు. చీటర్ చీటర్ అంటూ దురుసుగా ప్రవర్తించారు. వరల్డ్​కప్​లో టీమిండియా కెప్టెన్ విరాట్​ కోహ్లీ సైతం అలా అనొద్దంటూ వారిని వారించాడు.

ఇదీ చదవండి: బ్యాట్​తో భార్య.. బంతితో భర్త.. ఒకేసారి