ఏడాది మారినా టెస్టుల్లో కోహ్లీనే​ రారాజు

ఐసీసీ తాజా టెస్టు ర్యాంకింగ్స్​లో అగ్రస్థానాన్ని కాపాడుకున్నాడు టీమిండియా సారథి విరాట్​ కోహ్లీ. 928 పాయింట్లతో జాబితాలో టాపర్​గా నిలిచాడు. ఆస్ట్రేలియా స్టార్​ బ్యాట్స్​మన్​ స్టీవ్​ స్మిత్​ రెండో స్థానంలో ఉన్నాడు. బౌలింగ్​ విభాగంలో టాప్​-10లో ముగ్గురు భారత బౌలర్ల యథాతథంగా కొనసాగుతున్నారు.

ప్రపంచ టెస్టు ర్యాంకింగ్స్​ బ్యాటింగ్​ విభాగంలో.. భారత జట్టు సారథి విరాట్​ కోహ్లీ మొదటి స్థానంలోనే కొనసాగుతున్నాడు. 928 పాయింట్లతో టాప్​లో ఉన్నాడు. ఇటీవల న్యూజిలాండ్​తో మూడు సిరీస్​లు ఆడిన ఆసీస్​ బ్యాట్స్​మన్​ స్టీవ్​ స్మిత్... పెద్దగా రాణించలేదు. ఫలితంగా​ 911 పాయింట్లతో రెండో స్థానానికే పరిమితమయ్యాడు. ఆస్ట్రేలియాకు చెందిన సంచలన బ్యాట్స్​మన్​ మార్కస్​ లబుషేన్... ఒక స్థానం మెరుగుపర్చుకుని​ 3వ ర్యాంక్​కు చేరుకున్నాడు. మొత్తం 827 పాయింట్లతో ఉన్నాడు.

టాప్​-10 టెస్టు బ్యాట్స్​మన్​

టాప్​-10లో మరో భారతీయ బ్యాట్స్​మెన్​ ఛెతేశ్వర్​ పుజారా.. ఒక ర్యాంక్​ కోల్పోయి 6వ స్థానంలో నిలిచాడు. అజింక్య రహానే... రెండు స్థానాలు కోల్పోయి 9లో కొనసాగుతున్నాడు. ఇటీవల దక్షిణాఫ్రికాపై రాణించిన ఇంగ్లాండ్​ ఆటగాడు బెన్​ స్టోక్స్...​ 5 పాయింట్లు ఎగబాకి టాప్​-10లోకి చేరాడు.

బౌలింగ్​లో

బౌలింగ్​ ర్యాంకింగ్స్​లో జేసన్​ హోల్డర్​.. ఒక ర్యాంక్​ మెరుగుపర్చుకొని 3వ స్థానానికి చేరాడు. ఆస్ట్రేలియా పేసర్​ స్టార్క్​ 2 పాయింట్లు మెరుగుపర్చుకొని 5వ ర్యాంక్​లో ఉన్నాడు. ఇంగ్లాండ్​ బౌలర్​ జేమ్స్​ అండర్సన్​.. ఇటీవల ఐదు వికెట్లతో రాణించాడు. 5 స్థానాలు ఎగబాకి 7వ ర్యాంక్​లో నిలిచాడు.
భారత బౌలర్లు జస్ప్రీత్​ బుమ్రా(6), అశ్విన్​(9), షమి(10) అదే స్థానాల్లో కొనసాగుతున్నారు. తొలి రెండు స్థానాల్లో పాట్​ కమిన్స్​(ఆస్ట్రేలియా​), నీల్​ వాగ్నర్​(ఆస్ట్రేలియా​) ఉన్నారు. టాప్​-10లో ముగ్గురు భారత బౌలర్లు, ముగ్గురు కంగారూ​ ఆటగాళ్లు చోటు దక్కించుకున్నారు.

టాప్​-10 టెస్టు బౌలర్లు

ఛాంపియన్​షిప్​లో టాప్

ఐసీసీ ప్రపంచ టెస్టు ఛాంపియన్‌షిప్‌లో టీమిండియా అగ్రస్థానంలోనే కొనసాగుతోంది. 360 పాయింట్లతో టాప్​-1లో ఉంది. గతేడాది దక్షిణాఫ్రికాను 3-0తో వైట్‌వాష్ చేయడమే కాకుండా, వెస్టిండీస్‌తో, బంగ్లాపై 2 టెస్టుల సిరీస్‌లను గెలిచింది. 7 మ్యాచ్​ల్లోనే ఒక్కటీ ఓడిపోకుండా టాప్​లో ఉంది.

ఆస్ట్రేలియా 296 పాయింట్లతో రెండో స్థానానికి చేరింది. అయితే 10 మ్యాచ్​లు ఆడిన కంగారూ జట్టు... 7 మ్యాచ్​ల్లోనే గెలిచింది. రెండింటిలో ఓడిపోయి.. ఒకటి డ్రా చేసుకుంది.

ప్రపంచ ఛాంపియన్​షిప్​ పాయింట్ల పట్టిక

ఇంగ్లాండ్(86)​, పాకిస్థాన్(80)​, శ్రీలంక(80), న్యూజిలాండ్(60)​, దక్షిణాఫ్రికా(30) జట్లు వరుసగా జాబితాలో ఉన్నాయి. బంగ్లాదేశ్‌, వెస్టిండీస్​ ఖాతా తెరవలేదు. ఐసీసీ ప్రపంచ టెస్టు ఛాంపియన్‌షిప్‌లో మొత్తం తొమ్మిది దేశాలు తలపడుతున్నాయి.