ఒకానొక సమయంలో తీవ్ర మానసిక ఒత్తిడి అనుభవించినట్లు, ఆత్మహత్య చేసుకోవాలని, చాలాసార్లు ప్రయత్నించినట్లు చెప్పాడు టీమిండియా సీనియర్ క్రికెటర్ రాబిన్ ఉతప్ప. 2006లో టీమిండియా జట్టులోకి అరంగేట్రం చేసిన ఇతడు... జట్టులో బాగా రాణించాడు. భారత్ తరఫున 46 వన్డేలు, 13 టీ20ల్లో ప్రాతినిధ్యం వహించాడు. ఇటీవలే రాజస్థాన్ రాయల్స్ నిర్వహించిన లైవ్ చాట్లో 'మెదడు, శరీరము, ఆత్మ.. పాజిటివ్గా ఉండటం వల్ల కలిగే లాభాలు ఏంటి?' అనే అంశంపై ఉతప్ప మాట్లాడుతూ ఈ ఆసక్తికర విషయాన్ని పంచుకున్నాడు.
"2006లో క్రికెట్లోకి అరంగేట్రం చేసినప్పటి నుంచి ఇప్పటివరకు ఎదుర్కొన్న పరిస్థితుల కారణంగా ఎన్నో విషయాలు నేర్చుకున్నాను. వృద్ధి చెందుతూ వచ్చాను. నాలో ఉత్పన్నమయ్యే ప్రతికూల ఆలోచనలను నియంత్రించుకోగలిగే దశకు చేరుకున్నాను. 2009-2011 మధ్య తీవ్ర మనోవేదనకు గురయ్యాను. ఆత్మహత్య చేసుకోవాలనే ఆలోచనలు విపరీతంగా నాకు వచ్చేవి. కొన్ని సందర్భాల్లో బాల్కానీపై నుంచి దూకి చనిపోయేందుకు ప్రయత్నించాను. అయితే ఏదో ఓ కారణంతో అగిపోయేవాడిని. అనంతరం ఈ ఆలోచనల నుంచి బయటపడేందుకు తీవ్ర కృషి చేశాను. ప్రతిరోజు నన్ను నేనుగా అర్థం చేసుకోవడం ప్రారంభించాను. నా జీవితాన్ని సాధారణ స్థితికి తీసుకొచ్చేందుకు కొంతమంది సహాయం తీసుకున్నాను. ఏదేమైనప్పటికీ ఈ ప్రతికూల పరిస్థితుల నుంచి చివరికి బయటపడ్డాను. ఓ మనిషిగా రూపుదిద్దుకున్నాను. ఈ పరిస్థితి నాకు కొన్ని అనుభవాలను నేర్పించింది. క్రమంగా సానుకూలంగా అలోచించటం మొదలుపెట్టాను. జీవితంలో ఎదురయ్యే ప్రతికూల, అనుకూల పరిస్థితులను సమతుల్యం చేసుకుంటా జీవించాలి. అప్పుడే జీవితం సరైన రీతిలో ముందుకు సాగుతుంది"