భరతనాట్యం స్పిన్.. యువీ వీడియో వైరల్

లసిత్​ మలింగా బౌలింగ్ శైలి గుర్తుందా? చిరుతలా వచ్చి విసిరిసేనట్టుంది. భారత పేసర్​ బుమ్రాది?అతడిది కూడా విభిన్న శైలి. ఇప్పుడు క్రికెట్​లోకి మరో కొత్త తరహా బౌలింగ్​ విధానం వచ్చింది. అదే భరతనాట్యం. ఆ బౌలర్​ను పరిచయం చేశాడు మాజీ క్రికెటర్ యువరాజ్​ సింగ్.

చిత్రమైన బౌలింగ్​ శైలితో క్రికెట్​ను ఆసక్తిగా మలుస్తారు పలువురు బౌలర్లు. శ్రీలంక పేసర్ లసిత్ మలింగ, భారత సీమర్​ జస్​ప్రీత్​ బుమ్రా ఆ కోవకే చెందుతారు. వారు బంతి విసిరే విధానం భలే చమత్కారంగా ఉంటూ ప్రేక్షకులను అబ్బురపరుస్తుంది. ఇప్పుడు వారిబాటలోనే మరో కొత్త బౌలర్​ వినూత్న శైలితో మనముందుకొస్తున్నాడు. అతడు బౌలింగ్​ చేసే విధానాన్ని ఇన్స్​టాగ్రామ్​లో పంచుకున్నాడు మాజీ క్రికెటర్ యువరాజ్ సింగ్. దానికి భరతనాట్యం స్పిన్ అని పేరు కూడా పెట్టేశాడు.

యువీ ఇన్​స్టాగ్రామ్​లో పంచుకున్న వీడియో తెగ వైరల్ అవుతోంది. అందులో స్పిన్​ బౌలింగ్ చేస్తున్న బౌలర్​ శైలి భలే ఆకట్టుకుంటుంది. బొంగరంలా తిరుగుతూ అతడు చేసే బౌలింగ్​కు భరతనాట్యం శైలి స్పిన్​ అని పేరు పెట్టాడు యువీ. ఏమంటావ్ హర్భజన్ సింగ్​ అని భజ్జీని ప్రశ్నించాడతను.

ఇదీ చూడండి:'పాండ్య బ్రదర్స్‌.. ధైర్యంగా ఉండండి'