క్రికెట్లో ఓ బ్యాట్స్మన్ భారీ సిక్సర్ బాదితే సంబరపడతాం.. ఒకవేళ ఆ బంతిని స్టేడియం బయటపడేలా బాదితే ఔరా అనుకుంటాం. బ్యాట్స్మెన్ కూడా ఇలాంటి షాట్లకు సంతోషిస్తారు. అయితే క్లబ్ క్రికెట్లో ఇలాంటి సిక్సర్ బాది బాధపడ్డాడు ఓ క్రికెటర్. ఎందుకంటే.. అతడు బాదిన ఆ బంతి ఏకంగా తన కారు అద్దాల్ని బద్దల్ని కొట్టింది. దీంతో ఆ క్రికెటర్ గుండె పగిలినంత పనైంది. ఈ వీడియోను నెట్టింట్లో షేర్ చేయగా అది కాస్తా వైరల్గా మారింది. 'పాపం ఆ బ్యాట్స్మన్' అంటూ కామెంట్లు పెడుతున్నారు నెటిజన్లు.
ఏం జరిగింది?
ఇంగ్లాండ్ యార్క్షైర్లో ఇల్లింగ్వర్త్ సెయిట్ మేరీ-సోవర్బై సెయింట్ పీటర్స్ క్రికెట్ క్లబ్ల మధ్య జరిగిన ఓ లోకల్ మ్యాచ్లో ఈ సన్నివేశం చోటు చేసుకుంది. ఇల్లింగ్వర్త్ బ్యాట్స్మన్ అసిఫ్ అలీ ఓ బంతిని ఫైన్ లెగ్ దిశగా భారీ సిక్స్ బాదాడు. ఈ సిక్సును సెలబ్రేట్ చేసుకునేందుకు సిద్ధమవగా అది ఏకంగా తన కారుపై పడి ఒక్కసారిగా అతడిని షాక్కు గురి చేసింది. ఈ దెబ్బకు అతడి కారు వెనుక అద్దం పగిలిపోయింది. ఇక ప్రత్యర్థి ఆటగాళ్లు, అంపైర్లతో సహా అక్కడున్న వారంతా కడుపుబ్బా నవ్వుకున్నారు.
ఈ మ్యాచ్లో అసిఫ్ అలీ 43 పరుగులతో సత్తాచాటినా ఫలితం లేకపోయింది. ప్రత్యర్థి జట్టు సెయింట్ సోవర్బై ఏడు వికెట్ల తేడాతో గెలుపొందింది.