Asia Cup 2023 Stats : మినీ టోర్నీలో మనోళ్ల డామినేషన్.. రోహిత్, కుల్​దీప్ టాప్​

Asia Cup 2023 Stats : 2023 ఆసియా కప్​ దాదాపు ముగింపు దశకు వచ్చేసింది. ఇప్పటికే భారత్.. ఫైనల్ బెర్తును ఖరారు చేసుకోగా.. మరో ప్లేస్ కోసం పాకిస్థాన్, శ్రీలంక పోటీపడనున్నాయి. అయితే ఇప్పటివరకు ఈ టోర్నీలో టీమ్ఇండియా ప్లేయర్ల జోరు కొనసాగుతోంది. ఈ నేపథ్యంలో ఏయే ప్లేయర్లు లీడ్​లో ఉన్నారో తెలుసుకుందాం..

Asia Cup 2023 Stats :2023 ఆసియా కప్​లో టీమ్ఇండియాప్లేయర్లదే హవా నడుస్తోంది. టోర్నీలో ఓటమి అనేదే ఎరుగకుండా అద్భుతమైన ఆల్​రౌండ్ ప్రదర్శనతో​ భారత్​ దూసుకుపోతోంది. కెప్టెన్రోహిత్ శర్మ, స్టార్ ప్లేయర్ విరాట్ కోహ్లీ, యువ సంచలనం శుభ్​మన్​ గిల్, జట్టులో రీ ఎంట్రీ ఇచ్చిన కేఎల్ రాహుల్ బ్యాటింగ్​ విభాగాన్ని తమ భుజాలపై మోస్తున్నారు. ముఖ్యంగా హిట్​మ్యాన్ రోహిత్ శర్మ.. ఈ టోర్నమెంట్​లో నిలకడగా రాణిస్తున్నాడు.

పాకిస్థాన్​తో జరిగిన తొలి మ్యాచ్​లో రోహిత్ త్వరగా ఔటైనప్పటికీ.. తర్వాత జరిగిన మూడు మ్యాచ్​ల్లో(నేపాల్​, పాకిస్థాన్​, శ్రీలంక) వరుసగా 74, 56, 53 స్కోర్లు నమోదు చేశాడు. మొత్తం నాలుగు మ్యాచ్​ల్లో 64.67 సగటున 108.99 స్ట్రైక్ రేట్​తో 194 పరుగులు చేశాడు. ఈ క్రమంలో ప్రస్తుతం జరుగుతున్న టోర్నీలో అత్యధిక పరుగుల జాబితాలో అగ్రస్థానంలో కొనసాగుతున్నాడు.

టాప్ 5లో ఉన్న బ్యాటర్లు..

• నజ్​ముల్ హోసన్ శాంటో (బంగ్లాదేశ్) 193 పరుగులు
• బాబార్ అజామ్ (పాకిస్థాన్) 178 పరుగులు
• సదీర సమరవిక్రమ (శ్రీలంక) 167 పరుగులు
• కుశాల్ మెండీస్ (శ్రీలంక) 162 పరుగులు

రోహిత్ @10000..శ్రీలంతో మ్యాచ్​లో రోహిత్ హాఫ్ సెంచరీతో రాణించాడు. ఈ క్రమంలోనే అతడు వన్డేల్లో 10వేల మార్క్ అందుకున్నాడు. దీంతో వన్డేల్లో ఈ ఫీట్​ సాధించిన ఆరో భారత బ్యాటర్​గా రోహిత్ రికార్డులకెక్కాడు.

ఇక బౌలింగ్ విషయానికొస్తే.. గత మూడు మ్యాచ్​ల్లోనూ భారత్.. ప్రత్యర్థుల్ని ఆలౌట్ చేసి అదరగొట్టింది. చాలా కాలం తర్వాత జట్టులోకి రీ ఎంట్రీ ఇచ్చిన స్టార్ పేసర్ జస్​ప్రీత్ బుమ్రా.. కట్టుదిడ్డంగా బంతులు సంధిస్తున్నాడు. ఇక స్పిన్నర్లు కుల్​దీప్ యాదవ్, రవీంద్ర జడేజా తమ ఫామ్​ను చాటుకుంటున్నారు. 9 వికెట్లతో టీమ్ఇండియా స్పిన్నర్ కుల్​దీప్.. అత్యధిక వికెట్లు తీసిన లిస్ట్​లో టాప్​లో ఉన్నాడు.

టాప్ 5లో ఉన్న బౌలర్లు

• వెల్లలాగె (శ్రీలంక) 9 వికెట్లు
• హరీస్ రౌఫ్ (పాకిస్థాన్) 9 వికెట్లు
• తస్కిన్ అహ్మద్ (బంగ్లాదేశ్) 9 వికెట్లు
• షహీన్ అఫ్రిదీ (పాకిస్థాన్) 8 వికెట్లు

రెండు రోజుల్లో 0-9..టోర్నమెంట్ లీగ్​ దశ​లో నేపాల్​తో జరిగిన మ్యాచ్​లో కుల్​దీప్.. 10 ఓవర్లు బౌలింగ్ చేసినప్పటికీ వికెట్ తీయలేకపోయాడు. కానీ సోమవారం పాకిస్థాన్​తో జరిగిన మ్యాచ్​లో 5 వికెట్లతో సత్తా చాటాడు. ఇక మంగళవారం శ్రీలంకతో మ్యాచ్​లో నాలుగు వికెట్లు పడగొట్టి టీమ్ఇండియా విజయంలో కీలక పాత్ర పోషించాడు. దీంతో లీగ్ మ్యాచ్​ల్లో వికెట్లు తీయకపోయినప్పటికీ.. వరుస మ్యాచ్​ల్లో అద్భుతంగా బౌలింగ్ చేసి​ రెండు రోజుల్లోనే టాప్​లోకి దూసుకొచ్చాడు కుల్​దీప్.