కెప్టెన్‌ శిఖర్ ధావన్, వికెట్‌ కీపర్‌ సంజూ శాంసన్‌కు మాజీ క్రికెటర్‌ ఆకాశ్ చోప్రా మద్దతుగా నిలిచాడు. మూడో టీ20లో వీరిద్దరూ పరుగులు చేస్తారని ధీమా వ్యక్తం చేశాడు. మ్యాచులో వీరిద్దరే కీలకం అవుతారని, రుతురాజ్‌, పడిక్కల్‌ చేసే పరుగులు బోనస్‌ అవుతాయని పేర్కొన్నాడు. ప్రత్యర్థి జట్టుకు ఎలా ముగించాలో ఇంకా తెలియదని వెల్లడించాడు.
'ఆఖరి టీ20లో భారత్‌ బ్యాటింగ్‌ లైనప్‌కు శిఖర్ ధావన్, సంజూ శాంసన్ మూల స్తంభాలు. ఇక రుతురాజ్‌ గైక్వాడ్‌, దేవదత్‌ పడిక్కల్‌, నితీశ్‌ రాణా చేసే పరుగులు బోనస్‌. ధావన్, సంజు మెరుగైన స్కోర్‌ చేశారంటే ఏం జరుగుతుందో ఎవరికీ తెలియదు. ఆఖరి గీత ఎలా దాటాలో ఈ శ్రీలంక జట్టుకు తెలియదు. రెండో టీ20లోనూ వారు ఇబ్బంది పడ్డారు' అని ఆకాశ్ చోప్రా వెల్లడించాడు.