Denmark Open: రెండో రౌండ్​కు సింధు, శ్రీకాంత్

డెన్మార్క్ ఓపెన్​లో తొలిరోజు భారత్​కు శుభారంభం దక్కింది. మహిళల సింగిల్స్​లో సింధు, పురుషుల సింగిల్స్​లో శ్రీకాంత్, డబుల్స్​లో సాత్విక్-చిరాగ్ శెట్టి జోడీ రెండో రౌండ్​కు చేరుకుంది.

టోక్యో ఒలింపిక్స్​లో కాంస్యం సాధించిన తర్వాత ఆటకు దూరంగా ఉన్న భారత షట్లర్ పీవీ సింధు మళ్లీ రాకెట్ పట్టింది. డెన్మార్క్ ఓపెన్​ తొలి రౌండ్​లో ఘన విజయం సాధించింది. టర్కీకి చెందిన నెస్లిహాన్ యిగిట్​తో తలపడిన సింధు 21-12, 21-10 తేడాతో వరుస సెట్లలో గెలుపొంది రెండో రౌండ్​కు చేరుకుంది. సింధు స్పీడ్​కు ప్రత్యర్థి వద్ద సమాధానం లేకపోవడం వల్ల 30 నిమిషాల్లోనే పోరు ముగిసింది.

భారత పురుషుల డబుల్స్ జోడీ సాత్విక్-చిరాగ్ శెట్టి కూడా రెండో రౌండ్​లోకి ప్రవేశించారు. ఇంగ్లాండ్​కు చెందిన హెమ్మింగ్-స్టీవెన్​ స్టాల్లోవుడ్​పై 23-21, 21-15 తేడాతో గెలుపొందారు. తొలి సెట్​లో ప్రత్యర్థి నుంచి పోటీ ఎదురైనా.. రెండో రౌండ్​లో జోరు పెంచి విజయం సాధించిందీ జోడీ.

ఇక పురుషుల సింగిల్స్​లో కిదాంబి శ్రీకాంత్​ మరో భారత ఆటగాడు సాయి ప్రణీత్​పై విజయం సాధించి రెండో రౌండ్​కు చేరుకున్నాడు. ఇద్దరు భారత ఆటగాళ్ల మధ్య జరిగిన ఈ మ్యాచ్​లో 21-14, 21-11 తేడాతో ప్రణీత్​పై గెలిచాడు శ్రీకాంత్. మరో ఆటగాడు సమీర్ వర్మ కూడా తొలి రౌండ్​లో విజయ బావుటా ఎగరవేశాడు.