టీమ్ఇండియా కెప్టెన్‌ విరాట్ కోహ్లీ, అతడి సతీమణి నటి అనుష్కశర్మ జంతు ప్రేమికులు. ముఖ్యంగా శునకాలంటే ఈ జంటకి అమితమైన ప్రేమ. ఆకలితో అలమటించే మూగజీవాలకు ఎన్నోసార్లు ఆహారం అందించి వాటిపై తమ మమకారాన్ని చాటుకుంది విరుష్క జోడీ.
ఆ క్షణాల్ని డబ్బుతో వెలకట్టలేం: విరుష్క
టీమ్ఇండియా సారథి విరాట్ కోహ్లీ, అతడి సతీమణి నటి అనుష్క శర్మ గతేడాది లాక్డౌన్లో మూగజీవాలకు ఆహారం అందిస్తూ మంచి మనసు చాటుకున్నారు. తాజాగా ఆ వీడియోను నెట్టింట షేర్ చేసింది అనుష్క.
విరుష్క
కరోనా కారణంగా గతేడాది చాలాకాలం పాటు క్రికెట్‌ మ్యాచులు, సినిమా షూటింగులు లేకపోవడం వల్ల విరుష్క జోడీ ఇంట్లోనే ఉంటూ సరదాగా గడిపింది. ఆ సమయంలో వీరిద్దరూ తమ పెంపుడు కుక్కలతో ఆడుకునేవారు. అప్పట్లో లాక్‌డౌన్‌ వల్ల దుకాణాలన్నీ మూతపడ్డాయి. వీధుల్లో ఉండే శునకాలకు ఆహారం దొరక్క ఆకలితో అలమటించేవి. ఆ సమయంలో ఈ జంట ఆహార పదార్థాలతో పాటు తమ పెంపుడు కుక్కలను తీసుకుని గ్రామీణ ప్రాంతాల్లోకి వెళ్లింది. వీరు తీసుకెళ్లిన తిండిని చూసిన శునకాలు వెంటనే దగ్గరకు పరుగెత్తుకుంటూ వచ్చాయి. విరాట్, అనుష్కశర్మ వాటిని స్వయంగా చేతులతో పట్టుకుని ఆహారం అందించారు.
శునకాలతో గడిపిన ఆ క్షణాలను గుర్తుచేసుకుంటూ అనుష్కశర్మ తన ఇన్‌స్టాగ్రామ్‌ ఖాతాలో "కొన్ని ప్రత్యేకమైనవి. గతేడాది గడిపిన ఆ క్షణాలను డబ్బుతో విలువ కట్టలేం" అనే వ్యాఖ్య జత చేస్తూ వీడియోను పోస్ట్‌ చేసింది. ప్రస్తుతం ఈ వీడియో సామాజిక మాధ్యమాల్లో వైరల్‌గా మారింది. ఓసారి మీరూ చూసేయండి!