"ప్రేక్షకులు చూస్తారా?.. అయినా ఇలాంటి కథలు ఇదివరకెప్పుడైనా వచ్చాయా? ఆడాయా? ఇంత పెట్టుబడి పెట్టి తీయాలంటే.. రిస్కేమో?"
కొన్నేళ్ల కిందట కొత్త కథ అనగానే ఇలాంటి సందేహాలే వ్యక్తమయ్యేవి. ఫార్ములా సినిమాల మధ్య ఒకటీ అరా.. ఆడీ ఆడక అలా వచ్చి ఇలా వెళ్లిపోయే సదరు కొత్త కథలపై ఎవరికీ సదాభిప్రాయం ఉండేది కాదు. అందుకే అందరూ హిట్‌ ఫార్ములాని నమ్ముకొని ఆ కోవలో ప్రయాణం చేసేవారు. ఒక్కో సినిమా చూస్తున్నప్పుడు వాటిపై అంతకుముందే వచ్చిపోయిన ఓ ఆరేడు సినిమాల ప్రభావం కనిపించేది. ప్రేక్షకులు ఇవే చూస్తున్నారు కాబట్టి, మేం ఇవే తీస్తున్నామని దర్శకనిర్మాతలు చెప్పుకొచ్చేవారు. కొత్త కథలు ఎక్కడ నుంచి వస్తాయని హీరోలూ వారిని అనుసరించేవారు. ఇప్పుడు సన్నివేశం మారింది. కొత్తదనమే అసలైన ఫార్ములా అయ్యింది. విషయం ఉందని నమ్మితే చాలు.. సాహసాలకి సై అంటున్నారు. కథానాయకులు లెక్కల్ని పక్కనపెట్టేసి వాటికోసం ఎంత సమయమైనా కేటాయిస్తున్నారు. అందుకే గుర్తుండిపోయే సినిమాలొస్తున్నాయి. ప్రస్తుతం కథానాయకులు ఎంపిక చేసుకున్న కథల తీరుతెన్నుల్ని గమనిస్తే.. ఎంత వైవిధ్యం కనిపిస్తుందో!
కొన్నేళ్లుగా ప్రేక్షకుల అభిరుచుల్లో గొప్ప మార్పులు వచ్చాయి. వాస్తవికత, కొత్తదనం ఉన్న కథలకి పట్టం కడుతున్నారు. అది గమనించి అడుగులు వేస్తోంది చిత్రసీమ. ఇన్నాళ్లూ చేసిన కథలే చేస్తూ వచ్చిన కథానాయకులు ఇప్పుడు మరింత ఉత్సాహంతో కొత్త నేపథ్యాల వైపు మొగ్గుచూపుతున్నారు. అందుకోసం సాహసాలు చేస్తున్నారు.
కథానాయకుడు ప్రభాస్ నటిస్తున్న మూడు చిత్రాలు ప్రస్తుతం సెట్స్‌పై ఉన్నాయి. ఒకటి పీరియాడిక్‌ కథ. మరొకటి పురాణ గాథ, మరొకటేమో యాక్షన్‌ థ్రిల్లర్‌. 'రాధేశ్యామ్‌', 'ఆదిపురుష్‌', 'సలార్‌'.. ఇలా వరుసగా ప్రతి సినిమాలోనూ ఓ కొత్త రకమైన ప్రభాస్‌ని చూడొచ్చన్నమాట. ప్రభాస్ కథానాయకుడిగా నాగ్‌ అశ్విన్‌ దర్శకత్వంలో త్వరలోనే సెట్స్‌పైకి వెళ్లనున్న చిత్రం ఓ సరికొత్త నేపథ్యంలో సాగనుందని తెలుస్తోంది. ఇదివరకు అగ్రకథానాయకుడి సినిమా అంటే ఆరు పాటలు, ఆరు ఫైట్లు అనే లెక్కలతోనే మొదలయ్యేది. ఇప్పుడు కథ తర్వాతే మిగతా విషయాలు.
యువ కథానాయకుడు నాని ప్రస్తుతం ఓ పీరియాడిక్‌ కథలో నటిస్తున్నారు. అదే.. 'శ్యామ్‌ సింగరాయ్‌'. కలకత్తా నేపథ్యంలో సాగే ఈ సినిమాలో నాని మూడు కోణాల్లో కనిపిస్తారని సమాచారం.