చలిలో 'ఆర్ఆర్ఆర్' షూటింగ్.. తట్టుకునేందుకు అలా!

రాత్రి వేళలో 'ఆర్ఆర్ఆర్' సీన్స్ తీస్తున్నారు. చలి చంపేస్తున్నా సరే చిత్రబృందం కష్టపడుతోంది. అందుకు సంబంధించిన ఓ వీడియోను సోషల్ మీడియాలో పోస్ట్ చేశారు.

'ఆర్ఆర్ఆర్' చిత్రీకరణ ఫుల్ స్వింగ్​లో జరుగుతోంది. చలిని కూడా లెక్క చేయకుండా అర్ధరాత్రి వేళ.. కీలక సన్నివేశాల్ని తీస్తున్నారు. ఈ మేరకు గతవారానికి సంబంధించిన ఓ వీడియోను చిత్రబృందం పోస్ట్ చేసింది. అందులో దర్శకుడు రాజమౌళి, సినిమాటోగ్రాఫర్ సెంథిల్ కుమార్ తదితరులు చలిని తట్టుకునేందుకు హీటర్స్​ పక్కన నిల్చుని కనిపించారు.

ప్రస్తుతం రామ్​చరణ్, తారక్ లేకుండానే సీన్స్ తెరకెక్కిస్తున్నట్లు తెలుస్తోంది. దుబాయ్ నుంచి తారక్ వచ్చిన తర్వాత అతడికి సంబంధించిన సన్నివేశాల్ని పూర్తి చేయనున్నారు.

ఈ సినిమాలో చరణ్ అల్లూరి సీతారామరాజుగా, తారక్ కొమరం భీమ్​గా కనిపించనున్నారు. ఆలియా భట్, ఒలీవియా మోరిస్ హీరోయిన్లు. అజయ్ దేవ్​గణ్, సముద్రఖని తదితరులు కీలకపాత్రలు పోషిస్తున్నారు. కీరవాణి సంగీతమందిస్తున్నారు. డీవీవీ దానయ్య సుమారు రూ.350 కోట్ల బడ్జెట్​తో నిర్మిస్తున్నారు.