తన సినిమాలను ఎంత వేగంగా పూర్తి చేయగలరో.. అంతకంటే వేగంగా తన కథల్నీ సిద్ధం చేసుకోగలరు దర్శకుడు పూరి జగన్నాథ్. ఇప్పుడీ స్పీడ్‌తోనే ఈ లాక్డౌన్ విరామంలో రెండు స్క్రిప్టులు పూర్తి చేశారు పూరి. వీటిలో ఒకటి పాన్ ఇండియా స్థాయిలో రూపొందనున్న చిత్రమని ఇప్పటికే ప్రకటించారు కూడా. తాజాగా ఈ ప్రాజెక్టుకు సంబంధించి ఓ ఆసక్తికర విషయం బాలీవుడ్‌ వర్గాల్లో చక్కర్లు కొడుతోంది.
పూరి పాన్ ఇండియా కథ సల్మాన్ కోసమా!
లాక్డౌన్ సమయంలో కొత్త స్క్రిప్టు తయారు చేసుకునే పనిలో పడ్డారు దర్శకులు. పూరి జగన్నాథ్ ఇప్పటికే రెండు కథలు సిద్ధం చేసుకున్నారట. ఇందులో ఒకటి పాన్ ఇండియా సినిమా. అయితే ఈ చిత్రంలో సల్మాన్ ఖాన్ హీరోగా చేయనున్నారని టాక్.
పూరి
పూరి సిద్ధం చేసుకున్న ఈ పాన్ ఇండియా కథ.. కండల వీరుడు సల్మాన్ ఖాన్ కోసమని తెలుస్తోంది. ఇప్పటికే ఈ ప్రాజెక్టు విషయమై ఆయనతో సంప్రదింపుల ప్రక్రియను కూడా ప్రారంభించినట్లు గుసగుసలు వినిపిస్తున్నాయి. ఈ విషయంలో ఆయనకు నిర్మాత కరణ్‌ జోహర్‌ సహాయ సహకారాలు అందిస్తున్నారని సమాచారం. ప్రస్తుతం వీళ్లిద్దరి కలయికలోనే 'ఫైటర్‌' ముస్తాబవుతోంది. విజయ్‌ దేవరకొండ - అనన్య పాండే జంటగా నటిస్తున్న చిత్రమిది. ఇప్పటికే 40శాతానికి పైగా చిత్రీకరణ పూర్తి చేసుకుంది.
అన్నీ అనుకున్నట్లు జరిగితే ఈ సినిమా పూర్తయిన వెంటనే ఈ కొత్త పాన్ ఇండియా చిత్రం సెట్స్‌పైకి వెళ్లే అవకాశముంటుంది. మరి నిజంగా ఈ కథ సల్మాన్ కోసమేనా? లేక మరో బాలీవుడ్‌ హీరోతో తెరకెక్కిస్తారా? అన్నది తెలియాలంటే మరికొంత కాలం వేచి చూడక తప్పదు.