పవన్​ బర్త్​డే రోజు అభిమానులకు క్రిష్​ సర్​ప్రైజ్​

పవన్​ కల్యాణ్​ పుట్టినరోజును పురస్కరించుకుని ఆయన హీరోగా క్రిష్​ దర్శకత్వంలో రూపొందుతోన్న సినిమా ఫస్ట్​లుక్​ను విడుదల చేసింది చిత్రబృందం. ఈ సందర్భంగా పవన్​తో పదిహేను రోజుల అనుబంధాన్ని గుర్తు చేసుకున్నాడు దర్శకుడు క్రిష్​.

పవర్​స్టార్​ పవన్‌కల్యాణ్​ కథానాయకుడిగా ప్రముఖ దర్శకుడు క్రిష్‌ జాగర్లమూడి దర్శకత్వంలో ఓ చిత్రం తెరకెక్కుతోంది. పవన్​ పుట్టినరోజు సందర్భంగా ఆ సినిమాకు సంబంధించిన ఫస్ట్​లుక్​ పోస్టర్​ను సామాజిక మాధ్యమాల్లో విడుదల చేసింది చిత్రబృందం. ఇందులో చేతికి కడియం, ఉంగరాలు పెట్టుకుని కొత్త లుక్​తో పోస్టర్​ ఉంది.

"పవన్​ కల్యాణ్​ గారు.. పదిహేను రోజుల షూటింగ్​లో ప్రతిక్షణం టీమ్​ అందరికి జ్ఞాపకంలా కదులుతోంది. చిరస్థాయిగా నిలిచే విజయం కంటికి కనిపిస్తుంది. ఇందుకు కారణం మీరు, మీ ప్రోత్సాహం, మీ సహృదయం.. ఎప్పటికీ ఇలాగే కోట్లాది జనం శుభాకాంక్షలు అందుకుంటూ ఉండాలని ఆశిస్తూ.. హ్యాపీ బర్త్​డే పవన్​ కల్యాణ్​."

- క్రిష్ జాగర్లమూడి, దర్శకుడు

ఈ చిత్రానికి నిర్మాతగా ఏఎం రత్నం వ్యవహరిస్తుండగా.. ఎమ్​ఎమ్​ కీరవాణి స్వరాలను సమకూరుస్తున్నారు. రచయిత సాయి మాధవ్​ బుర్రా మాటలు అందించనున్నారు. ఇందులో తెలుగమ్మాయి పూజిత పొన్నాడ ప్రత్యేక గీతంలో నటించనుందని సమాచారం. ఈ సినిమాలో పవన్‌ బందిపోటుగా కనిపించనున్నారని ప్రచారం జరుగుతోంది.