"కృష్ణ అండ్ హిస్ లీలా' చిత్రం రెగ్యులర్‌ కథతో రూపొందిందే అయినా ఆ కథను నేటి తరానికి తగ్గట్లు కొత్త ట్రీట్‌మెంట్‌తో తెరకెక్కించారు. అందుకే ఈ చిత్రానికి ప్రతిఒక్కరూ చక్కగా కనెక్ట్‌ అవుతున్నారు" అన్నారు నిర్మాత డి.సురేష్బాబు. ఆయన నిర్మాణ సంస్థ సురేష్ ప్రొడక్షన్స్ నుంచి వచ్చిన చిత్రమిది. సిద్ధు జొన్నలగడ్డ హీరోగా రవికాంత్‌ పేరేపు తెరకెక్కించారు. రానా సమర్పించారు. ఇప్పటికే నెట్‌ఫ్లిక్స్‌లో విడుదలైన ఈ చిత్రం.. జులై 4 నుంచి 'ఆహా' ఓటీటీలోనూ రానుంది. ఈ సందర్భంగా సోమవారం ఆన్‌లైన్‌ ద్వారా మీడియాతో ముచ్చటించారు సురేష్బాబు.
'కృష్ణ అండ్ హిస్ లీలా' కథ ఎంపిక రానాదా? మీదా?
నాది కాదు రానాదే. ఈ ప్రాజెక్టు అనుకున్నాక 'ఎందుకు దీన్నే ఎంచుకున్నావని' తనని అడిగా. దానికి తను 'మా ఫ్రెండ్స్‌లో చాలా మంది కృష్ణ చేసిన పనినే చేస్తున్నారు. నేటితరం యువతకు కనెక్ట్‌ అయ్యేలా ఉంటుంద'ని చెప్పాడు.
'హిరణ్య కశ్యప' మీ బ్యానర్‌లో భారీ బడ్జెట్‌ చిత్రంగా రాబోతుంది. ప్రస్తుత పరిస్థితుల్లో బడ్జెట్‌ ఏమన్నా తగ్గించబోతున్నారా?
కొన్ని కథలకు ఏం చెయ్యాలో.. ఎంత ఖర్చు పెట్టి చూపించాలో అలాగే చెయ్యాలి. రాజీ పడి స్క్రిప్ట్‌లోనూ, బడ్జెట్‌లోనూ మార్పులు చెయ్యకూడదు. ఇలాంటి చిత్రాలన్నీ ప్రేక్షకులను థియేటర్లకు తిరిగి రప్పించేవి. కాబట్టి వాటిని ఆ స్థాయిలోనే చూపించాలి.
సొంతంగా ఓటీటీ పెట్టే అవకాశముందా?