ప్రపంచాన్ని గడగడలాడిస్తున్న మహమ్మారి కరోనా వైరస్ తెలుగు రాష్ట్రాల్లోనూ చాప కింద నీరులా వ్యాపిస్తోంది. బాధితుల సంఖ్య రోజు రోజుకూ పెరిగిపోతోంది. ఈ నేపథ్యంలో పలువురు సినీ స్టార్లు, సంగీత దర్శకులు, గాయకులు తమ పాటలతో ప్రజల్లో అవగాహన కల్పించే ప్రయత్నం చేస్తున్నారు. ఈ క్రమంలోనే ప్రముఖ కథానాయకులు చిరంజీవి, నాగార్జునతోపాటు యువ కథానాయకులు సాయితేజ్‌, వరుణ్ తేజ్ ఓ పాటలో నటించారు. దీనిపై ప్రధాని మోదీ తాజాగా ట్విట్టర్‌లో స్పందించారు.
"చిరంజీవి, నాగార్జున, వరుణ్ తేజ్, సాయి తేజ్ మీరందరూ ఇచ్చిన అతి చక్కని సందేశానికి నా ధన్యవాదాలు. అందరం మన ఇళ్లల్లోనే ఉందాం. అందరం సామాజిక దూరం పాటిద్దాం. కరోనా వైరస్పై విజయం సాధిద్దాం" అంటూ తెలుగులో ట్వీట్ చేశారు మోదీ. #ఇండియాఫైట్స్కరోనా అనే హ్యాష్‌ ట్యాగ్‌ను కూడా జత చేశారు. ఈ ట్వీట్ను రీట్వీట్ చేస్తూ మెగాస్టార్ చిరంజీవి, వరుణ్తేజ్, సాయి తేజ్.. మోదీకి ధన్యవాదాలు తెలిపారు.