వేగంగా సినిమాలను తెరకెక్కించే దర్శకుల జాబితాను తిరగేస్తే తెలుగులో తొలుత అందరికీ గుర్తొచ్చే పేరు పూరి జగన్నాథ్‌దే. ఎంత పెద్ద స్టార్‌ హీరోతో చేసినా సరే రెండు మూడు నెలల్లో చిత్రీకరణకు గుమ్మడికాయ కొట్టేయగలడు పూరి. ఇప్పుడిదే బాటలో నడుస్తున్నాడు ఓ యువ దర్శకుడు. 'అందాల రాక్షసి'తో నటుడిగా వెండితెరపై మెరిసి.. 'చిలసౌ' చిత్రంతో దర్శకుడిగా తొలి ప్రయత్నంలోనే ఓ భారీ హిట్‌ను ఖాతాలో వేసుకున్నాడు రాహుల్‌ రవీంద్రన్‌. తాజాగా నాగార్జునతో ఈ యువ దర్శకుడు తెరకెక్కిస్తున్న చిత్రం 'మన్మథుడు 2'. ’
నెలన్నర క్రితమే పోర్చుగల్‌లో చిత్రీకరణ మొదలై అక్కడి షెడ్యూల్‌ను పూర్తి చేసుకుంది ఈ చిత్రం. ఈ నేపథ్యంలోనే సినిమాకు సంబంధించి ఓ ఆసక్తికర అంశం బయటకొచ్చింది. ఈ ప్రాజెక్టు ఇటీవలే పట్టాలెక్కడంతో చిత్రీకరణ పూర్తయి తెరపైకి రావడానికి కనీసం ఓ ఐదు నెలల సమయమైనా అవసరమవుతుందని అంతా భావించారు. ఇక సరైన తేదీలు దొరికితే ఏ దసరాకో, క్రిస్మస్‌కో ఈ కొత్త బొమ్మ తెరపై చూడొచ్చనుకున్నారు. కానీ, తాజా సమాచారం ప్రకారం ఇంతకన్నా ముందుగానే 'మన్మథుడు 2' బాక్సాఫీస్‌ వద్ద సందడి చేయబోతున్నాడట.