'సూర్యపై కోర్టు ధిక్కార చర్యలు తీసుకోవాల్సిందే'

కోలీవుడ్​ నటుడు సూర్యపై కోర్టు ధిక్కార చర్యలు తీసుకోవాలని మద్రాస్​ హైకోర్టు ప్రధాన న్యాయమూర్తికి విన్నవించారు జస్టిస్​ ఎస్​.ఎం.సుబ్రహ్మణ్యం. ఈ విషయంలో హీరోపై తగిన చర్యలు తీసుకోవాలంటూ చీఫ్​ జస్టిస్​ ఏ.పి.సహికి లేఖ రాశారు. కరోనా సమయంలో నీట్​ పరీక్ష నిర్వహించడంపై కోర్టులను తప్పుబడుతూ సూర్య ఇటీవలే స్పందించారు.

కరోనా మహమ్మారి వ్యాపిస్తున్న క్రమంలో నీట్​ పరీక్ష నిర్వహించడంపై కోర్టులను తప్పుబట్టారు కోలీవుడ్​ నటుడు సూర్య. ఈ వ్యాఖ్యలపై కోర్టు ధిక్కార చర్య కింద హీరో మీద చర్యలు తీసుకోవాలని అభిప్రాయపడ్డారు న్యాయమూర్తి జస్టిస్​ ఎస్​.ఎం. సుబ్రహ్మణ్యం. ఈ మేరకు హైకోర్టు ప్రధాన న్యాయమూర్తి జస్టిస్ ఏ.పి సహికి​ లేఖ రాసినట్లు ఆయన సన్నిహిత వర్గాలు వెల్లడించాయి. ప్రస్తుతం ఈ విషయం నెట్టింట చర్చనీయాంశంగా మారింది.

తమిళనాడులోని ముగ్గురు నీట్​ విద్యార్థుల ఆత్మహత్యపై నటుడు సూర్య ఇటీవలే స్పందించారు. "ప్రాణాంతక కరోనా వైరస్​ భయంతో.. కోర్టులు వీడియో కాన్ఫరెన్సింగ్​ ద్వారా తీర్పులు చెబుతున్నాయి. కానీ, విద్యార్థులు నిర్భయంగా వెళ్లి పరీక్షలు రాయమని ఎలా ఆదేశిస్తున్నారు" అని ట్విట్టర్​లో నటుడు సూర్య ప్రశ్నించారు.