త్రివిక్రమ్​-ఎన్టీఆర్​ కొత్త సినిమా టైటిల్​ ఇదేనా..?

మాటల మాంత్రికుడు త్రివిక్రమ్​కు 'అ' అక్షరం బాగా కలిసొచ్చింది. అందుకేనేమో తన తర్వాతి చిత్రానికీ అదే అక్షరంతో మొదలయ్యే పేరును పరిశీలిస్తున్నట్లు ప్రచారం జరుగుతోంది.

సంక్రాంతికి 'అల..వైకుంఠపురములో' చిత్రంతో ప్రేక్షకుల ముందుకొచ్చి చక్కటి విజయాన్ని ఖాతాలో వేసుకున్నాడు దర్శకుడు త్రివిక్రమ్‌. అదే ఉత్సాహంతో తన తర్వాతి చిత్రంపై దృష్టి పెట్టేశాడు. ప్రస్తుతం చిత్రసీమలో వినిపిస్తున్న గుసగుసల ప్రకారం ఈ దర్శకుడి తర్వాతి చిత్రం జూనియర్ ఎన్టీఆర్‌తోనే అని తెలుస్తోంది. దీనిపై అధికారికంగా ఎలాంటి ప్రకటన రాకపోయినా.. సినీ వర్గాల్లో మాత్రం ఈ కలయికలో రెండో చిత్రం ఖాయమైనట్లు ప్రచారం జరుగుతోంది. అయితే నెట్టింట ఈ చిత్ర టైటిల్‌పై ఓ ఆసక్తికర చర్చ మొదలైపోయింది.

మాటల మాంత్రికుడు తన చిత్రాలకు 'అ' సెంటిమెంట్‌ను కొనసాగిస్తున్నాడు. తన కొత్త చిత్రానికి కూడా ఆ అక్షరం కలిసేలా ఓ అచ్చమైన తెలుగు పేరును పరిశీలిస్తున్నట్లు గుసగుసలు మొదలైపోయాయి. ఈ సినిమాకు 'అయిననూ పోయిరావలె హస్తినకు' అనే టైటిల్​ పెట్టబోతున్నట్లు ప్రచారం జరుగుతోంది. ఇప్పటికే ఈ పేరుతో నందమూరి అభిమానులు ఫ్యాన్‌ మేడ్‌ పోస్టర్లు కూడా సిద్ధం చేసి నెట్టింట హల్​చల్​ చేస్తున్నారు. ప్రస్తుతం తారక్‌ 'ఆర్‌ఆర్‌ఆర్‌' చిత్ర షూటింగ్‌తో బిజీగా ఉన్నాడు. ఈ సినిమా చిత్రీకరణ ఏప్రిల్‌ నాటికి ముగుస్తుందని, ఆ వెంటనే మే నుంచి త్రివిక్రమ్‌ చిత్రాన్ని ఈ హీరో పట్టాలెక్కిస్తాడని సమాచారం.

ఇదీ చూడండి.. పవన్ మరో సినిమా ప్రారంభం అప్పుడే..!